АҚШ ва Япония ҳарбий-ҳаво кучлари самолётлари Окинава ороли яқинида йирик машғулотлар ўтказди. Бу ҳақда Американинг Тинч океанидаги қўмондонлиги маълум қилди.
Ҳарбий машғулотларга 35 та самолёт ва бир вертолёт жалб қилинган. Хусусан, Америка томони Ҳарбий ҳаво кучларининг 8 та бешинчи авлод F-22 қирувчиси, 4 та F-16 қирувчиси ва 3 та KC-135 танкери, 4 та F/А-18 қирувчиси ва HH-60 ҳарбий-денгиз кучларининг вертолёти билан иштирок этди. Япония Ҳаво мудофаа кучлари эса тўртта F-15 қирувчи самолёти билан машғулотларда қатнашди.
Қўмондонлик маълумотларига кўра, машғулотлар икки томонлама АҚШ—Япония ҳарбий имкониятларини кучайтириш ва тактик кўникмаларни оширишга қаратилган.
Аввалроқ Хитой ва Россия сентябрь охиригача ҳарбий машғулотлар ўтказиши хабар берилганди. Хитой мудофаа вазирлигига кўра, машғулотларнинг мақсади икки мамлакат ҳарбийлари ўртасидаги “стратегик ҳамкорликни чуқурлаштириш” ва “хавфсизликка таҳдидларга биргаликда қарши курашиш” қобилиятини мустаҳкамлашдан иборат.
Изоҳ (0)