Шавкат Мирзиёев Олий Мажлис палаталари, сиёсий партиялар, суд ва ижро этувчи ҳокимият органлари раҳбарлари ҳамда жамоатчилик фаоллари билан референдум якунларига бағишланган учрашувда Конституцияда илк бор Ўзбекистонга ҳуқуқий давлат деган таъриф берилганига эътибор қаратди.
Конституцияда инсон ҳуқуқлари кафолатларига оид нормалар ҳам 3 баробар кўпайтирилди. Бу – авваламбор барча соҳада қонун устуворлиги таъминланади, дегани. Бундан буён, қонунлардаги ноаниқликлар инсон фойдасига ҳал бўлади.
“Энг муҳими, ‘Қонун – муқаддас, ҳар қандай ҳолатда ҳам адолатни қарор топтириш шарт!’, деган қараш жамиятнинг ҳар бир аъзоси, айниқса, мансабдорлар учун ҳаёт қоидасига айланиши керак. Шу билан бирга, инсон ҳуқуқ ва эркинликларини ишончли ҳимоя қилиш учун судларнинг одил ва мустақил иш юритишини, албатта, амалда таъминлашимиз зарур”, — дейди президент.
Шу мақсадда, асосий қонунда ҳеч ким суд қарорисиз 48 соатдан ортиқ ушлаб турилиши мумкин эмаслиги белгиланди; эркинликни чеклашга фақат суд қарори асосида йўл қўйилиши ҳақидаги қоида мустаҳкамланди; айбланувчига ўзига қарши кўрсатма бермаслик, яъни “сукут сақлаш” ҳуқуқи биринчи марта алоҳида белгилаб қўйилди; адвокатлар мақоми оширилиб, улар терговчи ва прокурор билан тенг ваколатга эга бўлди.
Асосий қонунга киритилган бу илғор янгиликларни амалда жорий этиш осон бўлмаслиги, кўп жамиятлар бундай ўзгаришларни фақат орзу қилиши қайд этилди. Бунинг учун суд-ҳуқуқ идораларининг кадрлар салоҳиятини яхшилаш ва моддий-техник базасини мустаҳкамлаш зарурлиги таъкидланди. Энг муҳими, терговчи, прокурор, судья ва адвокатларнинг билим ва малакаси, маънавий дунёсини юксалтириш билан бирга аҳолининг ҳам ҳуқуқий маданиятини ошириш, ҳаммамизнинг дунёқарашимизни ўзгартириш талаб этилади.
“Қандай оғир бўлмасин, бу ишларни амалга оширишни замоннинг ўзи тақозо этмоқда”, — дейди президент.
Шунингдек, йиғилишда давлат раҳбари Конституция лойиҳасини муҳокама қилишдан бошлаб то уни қабул қилгунча бўлган даврда ўтказилган умумхалқ муҳокамаларида миллионлаб фуқаролар фаол ва муносиб иштирок этганини қайд этиб, шу нуқтаи назардан янгиланган Конституциянинг чинакам муаллифи халқ бўлди, деб айтишга барча асослар борлигини таъкидлаган. Мамлакатда нуронийлар, ёлғиз кексалар, ногиронлиги бўлган инсонлар, алоҳида эътиборга муҳтож аҳоли қатламига ижтимоий хизматлар кўлами янада кенгайтирилиши айтилган.
Изоҳ (0)