Беларусь президенти Александр Лукашенко ўз ўғли Николайнинг иқтидорли болалар учун стипендия олишни давом эттиришига рухсат берувчи фармойишни имзолади. Бу ҳақда Беларусь нашри Reformation хабар бермоқда.
Нашрда таъкидланишича, Николай Лукашенко бу ижтимоий қўллаб-қувватлашдан илк бор фойдаланаётгани йўқ.
“Коля Лукашенко отасининг қарори билан махсус стипендия олишни давом эттиради”, дейилади хабарда.
Имзоланган ҳужжатга кўра, 2024/25-ўқув йилининг иккинчи семестри учун Беларусь давлат университетининг учинчи курс талабаси Николай Лукашенкога 229 беларус рубли (тахминан 885 минг сўм) миқдорида стипендия тайинланган.
Эслатишича, биринчи семестр учун кўрсаткич, давлат раҳбарининг январдаги қарорига биноан, 221,88 рублни (тахминан 853 минг сўм) ташкил этади. Улар таъкидлашича, Лукашенконинг ўғли BDУга ўқишга кирганидан буён иқтидорли болалар учун мунтазам равишда стипендия олиб келмоқда.
Николай Лукашенко – Беларусь президентнинг кенжа ўғли. У 20 ёшда бўлиб, отаси билан бирга мунтазам равишда расмий тадбирларда иштирок этади. Илгари уни олий даражадаги музокараларнинг энг ёш иштирокчиси деб аташган, энди эса президентнинг янги қарори туфайли у яна эътибор марказига тушган.
Изоҳ (0)