Айни кунларда ижтимоий тармоқларда “Менинг юртим” телеканали мухбири Рухсора Ғофурованинг Жиззахдаги тегишли банкда банк ходимаси фуқаролар номига кредит расмийлаштириб, ўзлаштирганлик билан боғлиқ материали жамоатчиликнинг қизғин баҳс-мунозараларига сабаб бўлмоқда.
Журналистлар уюшмаси масъуллари айни масалага ойдинлик киритиш мақсадида “Менинг юртим” телеканали мухбири Рухсора Ғофурова билан мулоқотда бўлди.
Унинг маълум қилишича, телеканалга 2024 йилнинг декабрь ойида фуқаролар Ойбек Очилов, Зебо Бойназарова ва унинг турмуш ўртоғи Жамолиддин Бойназаровлар томонидан ёзилган мурожаат хати келган. Демак, айни хат асосида “Менинг юртим” телеканали журналисти материал тайёрлаган.
Ушбу материал-лавҳа эфирга узатилгач, банк ходимаси мурожаатига кўра, пойтахтимиздаги тегишли ички ишлар бўлими Р. Ғофуровадан фақатгина айни ҳолат юзасидан тушунтириш хати олган холос. Буни Р. Ғофурованинг адвокати Амрулло Аҳмедов уюшмага маълум қилди.
Адвокатнинг айтишича, 2025 йил бугун, 24 январь кунги ҳолатда Р. Ғофуровага нисбатан маъмурий баённома тузилмаган. Демак, Р. Ғофуровага нисбатан маъмурий иш қўзғатилган қабилида ижтимоий тармоқларда тарқалган хабарлар асоссиз, дейилади уюшма хабарида.
Мазкур ҳолатни ўрганиш жараёнларида фуқаролар номига кредит расмийлаштириб, ўзлаштирганлиги айтилаётган банк ходимасининг турмуш ўртоғи судья экани ҳам маълум қилинган.
Ўзбекистон Журналистлар уюшмаси Ўзбекистон Республикасининг жиноят-процессуал кодексининг 322-моддаси 3-бандида оммавий ахборот воситалари берган хабарлар жиноят иши қўзғатишга сабаблар ва асослар қаторида қайд этилганини эслатади. Юқоридаги ҳолат бўйича тегишли органлардан қонунчиликда белгиланган талабларга мувофиқ ҳуқуқий баҳо берилишини сўрайди.
Уюшма “Менинг юртим” телеканали мухбири Рухсора Ғофурова билан боғлиқ ҳолат бўйича адолатли қарор қабул қилиниши таъминланишига ҳар жиҳатдан кўмаклашади. Ҳолат билан боғлиқ жараёнларни кузатади, ушбу масала бўйича қўшимча ахборот бериб борилишини маълум қилади, дейилади уюшма хабарида.
Аввалроқ инсон ҳуқуқлари фаоли Абдураҳмон Ташанов “MY5” канали мухбири Рухсора Ғофурова Жиззахдаги банк ходимасин фуқаролар номига кредит расмийлаштириб, ўзлаштиргани ҳақида материал таёрлагани, материал эфирга узатилгач, банк ходимасининг аризасига кўра Рухсора Ғофурованинг ўзига нисбатан маъмурий иш қўзғатилгани ҳақида хабар қилганди.
Банк ходимасининг ўзга шахслар номига олинган кредитининг бир қисмини унинг эри - Олий суд судьяси Шарофиддин Болиев ўз пластик картаси орқали тўлаб келган. Судья бу қонунбузарликдан хабардор бўлган ва қонунбузар аёлини ҳимоя қилган. Катта эҳтимол билан журналистга ҳужум ортида ҳам жанобнинг ўзлари турибди, деб ёзган Ташанов.
Изоҳ (0)