Toshkent viloyati sudining Fuqarolik ishlari bo‘yicha sudlov hayʼati “Xonsaroy” loyihasi tashabbuskori — Apelsin Residence va Qibray tumani hokimligi o‘rtasidagi mojaroni ko‘rib chiqishda OAV vakillari faoliyatiga cheklov qo‘ydi. Ochiq sudda qatnashgan “Daryo” jurnalisti jarayondan na foto, na video va na audioyozuvlar ololdi.
Kecha, 30-yanvar kuni Toshkent viloyati sudining Fuqarolik ishlari bo‘yicha sudlov hayʼati sudya Sharofiddin Hamroyev raisligida jamoatchilikka “Xonsaroy” loyihasi tashabbuskorlari sifatida yaxshi tanish bo‘lgan tadbirkorlik subyekti va Qibray tumani hokimligi o‘rtasidagi yer bilan bog‘liq mojaroni ko‘rib chiqdi.
“Daryo” tahririyati sudlov hayʼatiga mazkur ochiq sud majlisidan foto, audio hamda videomateriallar olish uchun ruxsat so‘rab, iltimosnoma kiritgandi. Sud taraflar fikrini o‘rganar ekan, daʼvogar va javobgarning qarshi emasligini, biroq, ishda ishtirok etayotgan davlat ayblovchisining fuqaro kiyimida bo‘lgani uchun tasvirga olish jarayonlariga qarshiligini ro‘kach qilib, nashrning bu iltimosnomasini rad etdi.
Men ayni paytda fuqaro kiyimidaman. Biz OAVga chiqsak, prokuror formasida bo‘lishimiz kerak. Shu sabab bu sud majlisida OAVning tasvirga olishiga qarshiligimni aytib, sudlov hayʼatidan bu iltimosnomani rad etishni so‘radim, — deydi “Daryo” jurnalistiga tushuntirish bergan Toshkent viloyati prokuraturasining 14-bo‘lim prokurori Mirzabobur Karimberdiyev.
Davlat ayblovchisi jurnalistning “Siz sudda fuqaro kiyimida bo‘lishingiz mumkinmi? Odatda sudda ham prokuror kiyimida bo‘lishingiz kerak emasmi?”, degan savoliga “Ha, sudda fuqaro kiyimida qatnashishim mumkin”, degan javobni berdi.
Sudlov hayʼati raisi Sharofiddin Hamroyev ham iltimosnomaning rad etilishi aynan prokuror eʼtiroziga bog‘liqligini taʼkidladi.
“Daryo” jurnalisti bilan suhbatlashgan advokatlardan birining maʼlumot berishicha, Bosh prokurorning 250-sonli buyrug‘ida prokuratura xodimlarining qachon formali kiyim boshda yurishi haqida ham so‘z borgan bo‘lib, aynan sudlarda ular formali kiyim boshda bo‘lishi talab etiladi.
Sudda qatnashgan davlat ayblovchisi formasiz sud jarayonida ishtirok etib xatoga yo‘l qo‘ygani yetmaganidek, sudyani ham qonunni buzishiga, ochiq sud majlisida OAV vakilining faoliyatiga asossiz cheklov qo‘yishiga sababchi bo‘lgan, deydi advokat.
Izoh (0)