Буюк Британияда уч нафар қизнинг ўлимига сабаб бўлган 18 ёшли Аксел Рудакубана 52 йилга қамалди. Тегишли қарор Ливерпуль Қироллик суди томонидан қабул қилинди.
Ўсмир 2024 йилнинг ёзида Саутпорт шаҳридаги болалар рақс клубига ҳужум қилганди. Оқибатда уч нафар қиз ҳалок бўлган. 20 январь куни судья Рудакубанага умрбод қамоқ жазосига тенг ҳукм берди. Ўсмир жиноят содир этган пайт 18 ёшда бўлмагани туфайли умрбодга қамалмади.
Қизларни ўлдиришдан ташқари, у яна 13 та жиноятда, жумладан, саккиз нафар бола ва икки нафар катталар ҳаётига суиқасд қилишда айбдор деб топилган. Рудакубана “Ал-Қоида” ўқув қўлланмасининг нусхасини сақлаш ва рицин заҳарини тайёрлаш бўйича айбини ҳам тан олган.
Ҳукм ўқиб эшиттирилаётган пайтда маҳкум мажлислар залида бўлмаган. У ўзини ёмон ҳис қилаётгани ҳақида бақириб, жараённи издан чиқаришга уринган ва шу сабабли хонадан чиқариб юборилган. Бироқ уни текширган шифокорлар маҳкумнинг соғлиғи ёмонлашганини тасдиқламаган.
Қурбонлар олти, етти ва тўққиз ёшли қизлар...
Рудакубана 2024 йил 29 июль куни Hope of Hart болалар рақс клубига пичоқ билан бостириб кирди. Ҳужум оқибатида 7 ёшли Элси Дот Станкомб, 9 ёшли Алиса Дасилева Агиар ва 6 ёшли Биби Кинг ҳалок бўлди. Яна бир неча бола пичоқ билан жароҳатланган. Полициянинг фикрича, Рудакубана ҳужум пайтида “Ал-Қоида” қўлланмасидан пичоқ санчиш усулларини ўрганган.
“Мен болалар ўлганидан жуда хурсандман. Бу мени бахтли қилади”, деган Рудакбана полиция бўлимида.
Ҳужумдан сўнг Британиянинг бир қанча шаҳарларида — Лондон, Бристол, Белфаст, Саутпорт, Ҳалле, Ливерпуль, Манчестерда тартибсизликлар ва муҳожирларга қарши норозиликлар бошланган. Намойишчилар муҳожирлар ва полиция билан тўқнашган, полиция участкалари, дўконлар ва масжидларни вайрон қилган.
Тартибсизликлар Channel3 Now сайти томонидан бошланган дезинформация тўлқини туфайли юзага келган. АҚШ ахборот агентлиги ниқоби остидаги ушбу манба клубга ҳужумни “17 ёшли мусулмон, Али Ал-Шокатий исмли қочоқ” амалга оширгани ҳақида фейк хабар эълон қилган. Кейинчалик суд унинг шахсини ошкор қилишга рухсат берган. У Кардиффда 2006 йилда туғилган, келиб чиқиши руaндалик экани аниқланган. Рудакбана бутун умри давомида Буюк Британияда яшаб келган.
Изоҳ (0)