Таниқли телебошловчи Нилуфар Сотиболдиева Instagram саҳифасидаги қизи билан рақс тушаётгани акс этган видео остига ҳақоратомуз изоҳ ёзган эркак билан судлашди.
Маълум қилинишича, ўтган йили 30 июнь куни Навоий вилоятида яшовчи фуқаро Сотиболдиеванинг Таиландда қизи билан олган ва Instagram саҳифасига жойлаштирган видео остида бошловчини сўкиб, изоҳ қолдирган.
Суд мажлисида судланувчи айбига тўлиқ иқрорлигини билдирган. Нилуфар Сотиболдиева эса ушбу ҳолат содир бўлгач мазкур шахсга “Сенинг ҳам оиланг борми? Нимага бундай гапларни ёзасан”, деб мурожаат қилгани ва унинг расмини ўзининг аккаунтига жойлаштиргани, шундан сўнг ушбу аккаунт эгаси унга яна турли хил гапларни ёзиб расмларни олиб ташлашини сўрагани ва ушбу ҳолат бўйича ариза билан мурожаат қилгани, судланувчи билан ярашиш мумкинлиги ва ярашув институти тартиби тушунтирилгани, бироқ ярашмаслигини, зеро қолганларга дарс бўлишини, судланувчига нисбатан қонуний чора кўрилишини сўраб, маънавий зарар сифатида юз миллион сўм талаб қилиши ҳақида кўрсатма берган.
Судья Баҳром Бердиев судланувчини Ўзбекистон Республикаси Жиноят кодексининг 140-моддаси (ҳақорат қилиш) 2-қисми билан айбдор деб топди. Унга иш ҳақининг 10 фоизини давлат даромади ҳисобига ушлаб қолган ҳолда 1 йил муддатга ахлоқ тузатиш ишлари жазоси тайинланди.
Аввалроқ таниқли актёр Матёқуб Матчонов танишини ҳақорат қилгани учун жаримага тортилган эди.
Изоҳ (0)