Жиззахдаги банк ходимасининг фирибгарлиги юзасидан материал тайёрлаган MY5 канали мухбирига нисбатан маъмурий иш қўзғатилди. Бу ҳақда инсон ҳуқуқлари фаоли Абдураҳмон Ташанов маълум қилди.
Маълум қилинишича, MY5 канали мухбири Рухсора Ғофурова Жиззахдаги банк ходимасининг фирибгарлиги юзасидан материал тайёрлаган. Журналистик суриштирув жараёнида банк ходимасининг фуқаролар номига кредит расмийлаштириб, ўзлаштиргани тилга олинади.
“Видеолавҳада тилга олинган қонунбузарликка оид ҳужжатларни ўргандим ва қонунга мувофиқ, кўрсатув эфирга узатилгач, ходимага нисбатан дарҳол жиноят иши қўзғатилиши лозим эди. Чунки Жиноят процессуал кодекси талабларига кўра, ОАВнинг жиноят ҳақида берган хабари жиноят иши очилишига асос бўлади”, дейилади постда.
Бироқ банк ходимасининг аризасига кўра Рухсора Ғофурованинг ўзига нисбатан маъмурий иш қўзғатилган.
“Эмишки, журналист банк ходимасининг шаън ва қадр-қимматини камситибди ҳамда унинг жинояти ҳақида хабар бериб, қонунбузарлик содир этибди. Ҳужжатлардан кўринишича, банк ходимасининг ўзга шахслар номига олинган кредитининг бир қисмини унинг эри - Олий суд судьяси Шарофиддин Болиев ўз пластик картаси орқали тўлаб келган. Судья бу қонунбузарликдан хабардор бўлган ва қонунбузар аёлини ҳимоя қилган. Катта эҳтимол билан журналистга ҳужум ортида ҳам жанобнинг ўзлари турибди”, деб ёзади Ташанов.
Абдураҳмон Ташанов қонун амал қилмайдиган жамиятда бу каби унсурга ажабланмаслигини қўшимча қилган.
“Бу жиноятларни Олий суднинг ўзи қўллаб-қувватласа ҳам ҳайратланмайман - Жунгли қонуни. Кимдир ўзини Рухсорага ҳамкасб ҳисобласа, бирлашайлик, ҳақ сўзни ҳимоя қилайлик. Адвокат дўстларимиз, илтимос, ёрдам қўлини чўзинг! Зўравонликка тўқнашиш ҳаммамизнинг бошимизда борга ўхшайди”, дея қўшимча қилган инсон ҳуқуқлари фаоли.
Изоҳ (0)