Исроил қамоқхоналари бошқармаси Ғазо секторидаги ўт очишни тўхтатиш бўйича келишув доирасида озод қилинаётган фаластинлик маҳкумларга махсус билагузуклар беришни бошлади. Бу ҳақда Исроил телеканали хабар бермоқда.
Уларда идентификация рақами, шунингдек, иброний ва араб тилларида “Халқ умрбод унутмайди” ва “Мен душманларимни таъқиб қиламан ва уларни қувиб етаман” иборалари қайд этилган.
Озодликка чиқарилган фаластинликларга бу билагузуклар қачон берила бошланганига аниқлик киритилмаган.
Жорий йилнинг 19 январь куни Ynet портали ҲАМАС томонидан озод қилинган исроиллик гаровга олинган Эмили Дамари ва Роми Гоненларга “эсдалик совғалари” бераётгани акс этган видеони эълон қилганди. Совға Ғазо секторининг харитаси, “озодлик сертификатлари” ва аёлларнинг асирликда бўлган вақтдаги фотосуратларини ўз ичига олади.
ҲАМАС 30 январь куни гаровга олган саккиз кишини — уч нафар исроиллик ва беш нафар Таиланд фуқаросини Қизил Хочга топширди. Исроил бунинг эвазига 110 нафар фаластинлик маҳбусни озод қилди.
Озод қилинганлар орасида Исроил армиясининг 20 ёшли ҳарбий хизматчиси Агам Бергер ҳам бор. У 482 кун асирликда бўлган. Шунингдек, 29 ёшли Арбел Яҳуд ва 80 ёшли Гади Мозес ҳам озод қилинган. Яҳуднинг турмуш ўртоғи ва акаси ҳали ҳам асирликда қолмоқда.
Фаластинлик 110 нафар маҳбусдан 32 нафари умрбодга қамалган, 48 нафари эса узоқ муддатли қамоқ жазосини ўтаётганди. Шунингдек, икки нафари 15 ёшли ўсмир, 30 нафари 18 ёшгача бўлганлардир. Озод қилинган маҳбусларнинг 21 нафари чет элга депортация қилиниши керак.
Исроил ва ҲАМАС 19 январдан Ғазо секторида ўт очишни тўхтатишга келишиб олди. Ўшандан бери томонлар ҳар ҳафта гаровга олинганлар ва маҳбусларни алмашмоқда. Битим шартларига кўра, ҲАМАС уч нафардан, сулҳнинг 42-кунида эса 14 нафар асирни озод қилишлари шарт. Бунга жавобан Исроил 1850 дан ортиқ фаластинлик маҳбусни озод қилишга ваъда берган.
Томонлар сулҳнинг кейинги босқичлари параметрларини ҳам муҳокама қилмоқда.
Изоҳ (0)