Исроил кучлари босиб олинган Ғарбий Соҳилда икки ёшли фаластинлик қизни отиб ўлдирди. Бу ҳақда Al Jazeera хабар берди.
Лаила ал-Хатиб исмли қиз 25 январь куни бошига ўқ узилганидан сўнг “жиддий жароҳатлар” туфайли вафот этган. Қизнинг ҳомиладор онаси ҳам ҳужумда енгил жароҳат олгани айтилмоқда.
Исроил ҳарбийлари воқеани текшираётганини, фаластинлик жангчилар борлиги ҳақида маълумот олишгач, бинога ўт очилганини маълум қилди. Ал-Хатибнинг бувиси воқеа содир бўлганида оила кечки овқат қилаётганини айтди.
“Отишмалар бўлди ва деразалар синди. Қизлар ўқ овозларини эшитгач, ичкарига югура бошлади. Онаси уни овқатлантираётганда, снайпер ўқи унинг бошига тегди”, деди у ва қиз онасининг ягона фарзанди эканини қўшимча қилди.
Исроил армияси сўнгги йилларда Фаластин қаршилигининг рамзи сифатида қаралган Женинда бир неча марта рейдлар ва босқинлар ўтказди. Унинг сўнгги операцияси Ғазо секторида ўт очишни тўхтатиш кучга кирганидан бир кун ўтиб бошланди. Секторда тахминан 15 ой давом этган Исроил ҳужумлари оқибатида 47 мингдан ортиқ фаластинлик ҳалок бўлганди.
Фаластин Соғлиқни сақлаш вазирлигига кўра, Женин ва унга туташ қочқинлар лагерида давом этаётган ҳарбий амалиёт камида 14 фаластинликнинг ҳаётига зомин бўлган. Ўнлаб одамлар яраланди, минглаб одамлар уй-жойларини тарк этишга мажбур бўлди.
Исроил армиясининг рейдлари кўплаб одамларнинг қурбон бўлишидан ташқари, асосий йўлларни бульдозерлаш ва уйларни бузиш каби кенг вайронагарчиликларга олиб келди. Исроил бош вазири Биньямин Нетаньяху операциянинг “терроризм”ни йўқ қилишга қаратилганини айтди.
Изоҳ (0)