Исроил ҳукумати ҲАМАСнинг гаровдаги исроилликларни қайтариш жараёнини ташкил этишига норозилик билдириш мақсадида фаластинлик маҳбусларни озод қилишни тўхтатишга қарор қилди. Бу ҳақда The Times of Israel нашри бош вазир Биньямин Нетаньяху идорасининг баёнотига таяниб хабар берди.
Исроил воситачилардан бунга эришишни талаб қилмоқда, дейилади идора баёнотида.
Аниқланишича, фаластинлик маҳбусларнинг озод этилиши исроиллик гаровга олинганларнинг кейинги гуруҳларини хавфсиз шароитда озод қилиш кафолатлари олинмагунча кечиктирилган.
Қуддусдан унча узоқ бўлмаган Офер қамоқхонасидан маҳбусларни олиб кетаётган автобуслар тўхтаб қолди. Улар бир муддат тургач орқага бурилишди, деб ёзади Ynet нашри.
Исроил телевидениесининг 12-канали ҳам маҳбуслар алмашинувининг тўхтатилиши исроиллик гаровга олинганларнинг ҲАМАС асирлигидан сўнгги марта озод қилиниши билан боғлиқ эканини ёзган.
Мен гаровга олинганларимизни озод қилиш пайтида содир бўлган даҳшатли манзараларни қатъий қоралайман. Бу ҲАМАСнинг тасаввурга сиғмайдиган шафқатсизлигидан яна бир далолат. Мен бундай даҳшатли манзаралар такрорланмаслигини ва гаровдагиларимизнинг хавфсизлиги кафолатланишини талаб қиламан, деди Нетаньяху.
30 январь куни ҲАМАС расмийлари Қизил Хоч ходимларига Исроил фуқаролари Агам Бергер, Арбел Еҳуд ва Гади Моше Мозесни, шунингдек, Таиланднинг беш фуқаросини топширди. Бунга жавобан Исроил 110 нафар фаластинлик маҳбусни қамоқдан озод қилиши керак эди.
Изоҳ (0)