Исроил мудофаа вазири Ёав Галант Исроил армияси сулҳ тугаганидан кейин Ғазо сектори бўйлаб катта кучлар билан жанг қилишини айтди, деб хабар бермоқда The Times of Israel. Вақтинчалик сулҳ 29 ноябрда тугаши керак.
“Сизда бир неча кун бор, биз жанговар ҳаракатларга қайтамиз, худди аввалгидек, балки ундан ҳам кўпроқ куч билан жанг қиламиз. Эсда тутингки, сиз режа қилаётганингизда, дам олаётганингизда ва вазиятни ўрганаётганингизда, душман ҳам худди шундай қилади. Сиз ҳар томонлама тайёр душман билан учрашасиз”, — деди Галант Гивати пиёдалар бригадаси ва зирҳли корпус аскарлари билан учрашувда.
Вазирнинг айтишича, сулҳ тугаганидан кейин Исроил армияси Фаластиннинг ҲАМАС ҳаракатини Исроил ҳаво кучлари бомбалари билан, кейин танк ва артиллерия снарядлари, Д9 ҳарбий бульдозерлари ва ниҳоят пиёдалар отишмаси билан кутиб олади.
22 ноябрь куни Исроил ва ҲАМАС вақтинчалик ўт очишни тўхтатиш ва гаровга олинганларни маҳбусларга алмашишга келишиб олди. Тўртинчи алмашинув бугун, 28 ноябрга ўтар кечаси бўлиб ўтди. 11 нафар исроиллик гаровга олинган ватанларига қайтди, 33 нафар фаластинлик маҳбус қамоқдан озод этилди.
Изоҳ (0)