Исроил армияси саккиз кундан буён Иордан дарёсининг босиб олинган ғарбий қирғоғининг шимолий қисмида ҳужумларни кенгайтиришда давом этмоқда.
Гувоҳларнинг айтишича, Исроил ҳарбийлари Тулкарм шаҳри ҳамда Тулкарм ва Нур-Шамс қочқинлар лагерларида рейдлар ўтказган. Тулкарм қочқинлар лагери Халқ қўмитаси раиси Файсал Саламага кўра, ҳарбийлар ўнлаб оилаларни уйларидан кўчирган, босиб олинган уйларни эса казармаларга айлантирган.
Фаластинликлардан “тирик қалқон” сифатида фойдаланилмоқда
Саламанинг таъкидлашича, Исроил ҳарбийлари фаластинликлардан тирик қалқон сифатида фойдаланмоқда. Фаластинлик амалдорнинг сўзларига кўра, Исроил армияси лагер инфратузилмасини бузишни бошлаган.
Исроил армияси 21 январдан бери Иордан дарёсининг Ғарбий қирғоғидаги Женин шаҳри ва худди шу номдаги қочқинлар лагерига шиддатли ҳужумларни давом эттирмоқда, бир оз аввалроқ эса Тулкармда ҳам ҳужумлар бошланган. Нетаньяхунинг тушунтиришича, операциянинг мақсади Женинда терроризмни илдизи билан йўқ қилишдан иборат. Фаластиндаги “Исломий жиҳод” ташкилотининг ҳарбий қаноти ҳисобланмиш “Сарая ал-Қудс” гуруҳи Исроил ҳужумига қарши турганини маълум қилди.
Исроил армияси маълумотларига кўра, Тулкарм ва шу номдаги лагерга ҳужумларда кўплаб исроиллик ҳарбийлар иштирок этган. Исроил дронлари Тулкармда автомобилга зарба бериши оқибатида 2 нафар фаластинлик ҳалок бўлди, яна 3 киши яраланди.
Женинга ҳам ҳужумлар давом этмоқда
Исроил ҳарбийлари 21 январдан бери Иордан дарёсининг Ғарбий қирғоғи шимолида жойлашган Женинга ҳам ҳужумларни давом эттирмоқда.
Фаластинликларнинг мол-мулки ҳужум нишонига айланган. Ҳозирга қадар 16 нафар фаластинлик, шу жумладан бир бола ҳалок бўлгани, яна 50 киши яралангани маълум қилинди.
19 январь куни Ғазо секторида ўт очишни тўхтатиш тўғрисидаги битим кучга киргандан сўнг, Исроил армияси 1 январь куни босиб олинган Иордан дарёсининг Ғарбий соҳилининг шимолий қисмидаги Женин шаҳрида “Темир девор” номли операцияни бошлади.
Исроил армиясининг Женин шаҳри ва худди шу номдаги қочқинлар лагерига давом этаётган ҳужумларида 16 нафар фаластинлик ҳалок бўлди, 50 га яқин киши яраланди. Армия транспорт, сув, электр энергияси ва алоқа инфратузилмасига зарар етказмоқда, шунингдек, минтақадаги уйларни вайрон қилмоқда.
2023 йил 7 октябрда Ғазода геноцид бошланганидан бери босиб олинган Иордан дарёсининг Ғарбий қирғоғи ва Шарқий Қуддусда Исроил армиясининг қўлга олишлари, рейдлари ва фаластинликларга ҳужумлари кўпайди.
Изоҳ (0)