АҚШ собиқ президенти Дональд Трамп ва унинг оиласи у лавозимда бўлган даврда хорижий давлатлар ҳукуматларидан олган умумий қиймати тахминан 291 минг долларлик юздан ортиқ совғалар ҳақида ҳисобот бермаган. Бу ҳақда АҚШ Конгресси Вакиллар Палатасининг назорат бўйича қўмитасидан демократлар эълон қилган ҳужжатда айтилади.
Ҳужжатга кўра, Трампнинг рўйхатдан ўтмаган совғалари орасида Ўзбекистон президенти Шавкат Мирзиёев томонидан ҳадя қилинган баҳоси 12 минг долларгача бўлган ипак гилам, Япония собиқ бош вазири Синдзо Абэнинг баҳоси 3 755 долларгача бўлган олтин гольф тўплари бор. Трампнинг куёви, тадбиркор Жаред Кушнер эса Саудия шаҳзодаси Муҳаммад бин Салмондан баҳоси 24 минг долларгача бўлган ханжар ва 8 800 долларлик иккита қилич тўпламини олган.
Бундан ташқари Трамп Сальвадор президенти Найиба Букеледан ўзининг реал ўлчамда чизилган портретини ҳам олган, баъзи маълумотларга кўра, сурат Трампнинг шахсий мулки сифатида Флоридадаги собиқ АҚШ президенти қароргоҳига юборилган бўлиши мумкин, дейди конгрессменлар.
Уларнинг сўзларига кўра, Трамп ва яқинлари Америка қонунларида белгиланган меъёрдан қимматроқ совғаларни қабул қилган, бу ҳақда хабар бермаган ва ниҳоят, қоидага кўра, давлат ҳисобида сақланиши керак бўлган совғаларни ўзлаштириб олган.
Хорижий совғалар ва безаклар тўғрисидаги қонун президент ва федерал амалдорларга баҳоси белгиланган қийматдан юқори бўлган чет эл совғаларини ўзида сақлашни тақиқлайди, ҳозирда бу қиймат — 415 долларга тенг.
Изоҳ (0)