Америка Қўшма Штатлари президенти Дональд Трамп АҚШнинг Жаҳон соғлиқни сақлаш ташкилоти (ЖССТ)дан чиқишини эълон қилди.
Трамп ўз инаугурациясидан сўнг имзолаган дастлабки расмий ҳужжатлардан бири Қўшма Штатларнинг ЖССТдан чиқиши тўғрисидаги фармон бўлди. У ташкилотнинг 2020 йилда Уханда (Хитой) юзага келган COVID-19 пандемияси, шунингдек, соғлиқни сақлаш соҳасидаги бошқа глобал инқирозлар пайтидаги самарасиз ҳаракатларига ишора қилди.
Фармонда “ЖССТ зудлик билан зарурий ислоҳотларни ўтказишга ва ташкилотга аъзо давлатларининг ноўрин сиёсий таъсиридан мустақиллигини намойиш этишга қодир эмаслиги” ҳақида сўз боради. Трампнинг таъкидлашича, бундан ташқари, ЖССТ Қўшма Штатлардан бошқа мамлакатлар тўловларидан сезиларли даражада юқори бўлган адолатсиз бадал тўловларини талаб қилишни давом эттирмоқда.
Аҳолиси 1,4 миллиард кишини ташкил этадиган Хитойнинг аҳолиси АҚШ аҳолисидан уч баравар кўп, аммо у ЖССТга деярли 90 фоиз камроқ маблағ ажратади, дейди Трамп.
Янги фармонга кўра, президентнинг миллий хавфсизлик масалалари бўйича ёрдамчиси Миллий хавфсизлик кенгаши доирасида жамоат саломатлигини ва биологик хавфсизликни ҳимоя қилиш механизмларини ишлаб чиқиши лозим.
АҚШ етакчиси давлат котибига ва Маъмурий-бюджет бошқармаси директорига ҳукуматнинг ЖССТга ҳар қандай маблағ, қўллаб-қувватлаш ёки ресурсларини ўтказишни тўхтатиш учун тегишли чоралар кўришни; ЖССТ билан ишлайдиган АҚШ ҳукумати ходимлари ёки пудратчиларини чақириб олиш ва қайта тайинлашни; шунингдек, илгари ЖССТ томонидан бажарилган зарур вазифаларни амалга ошириш учун АҚШда ва хорижда ишончли ҳамда шаффоф ҳамкорларни аниқлашни топширди.
Трамп Оқ уйнинг пандемияга тайёргарлик кўриш ва жавоб бериш сиёсати бўйича директорига 2024 йилги АҚШ соғлиқни сақлаш соҳасидаги глобал хавфсизлик стратегиясини имкон қадар тезроқ қайта кўриб чиқиш, бекор қилиш ва ўзгартириш вазифасини юклади.
Бундан ташқари, чиқиш жараёни давом этар экан, давлат котибига ЖССТнинг Пандемия тўғрисидаги келишуви ва Халқаро тиббий-санитария қоидаларига киритилаётган ўзгартиришлар бўйича музокараларни тўхтатиш топширилди. Ушбу келишувларни амалга ошириш бўйича ҳар қандай ҳаракатлар Қўшма Штатлар учун мажбурий кучга эга бўлмаслиги таъкидланди.
Президент ўз сайловолди кампанияси давомида “соғлиқни сақлашга қатъий содиқ бўлишга, шунингдек, суверенитет ва эркинликни қўллаб-қувватловчи давлатларнинг янги иттифоқини тузиш устида ишлашга” ваъда берган эди.
CNN телеканалига берган интервьюсида Байден маъмурияти даврида Оқ уйнинг COVID-19га жавоб бериш бўйича координатори лавозимида ишлаган доктор Ashish Жа Трампнинг ЖССТдан чиқиш қарорини “стратегик хатó” деб баҳолади.
Жаҳон соғлиқни сақлаш ташкилоти жуда муҳим ташкилот ҳисобланади ва Американинг ундан чиқиши натижасида фақат битта мамлакат, яъни Хитой тўлдира оладиган сиёсий бўшлиқ вужудга келади, дейди у.
Изоҳ (0)