Яман ҳусийлари Қизил денгизда Исроилга алоқадор кемаларга ҳужум қилиши туфайли 2024 йилда жаҳон иқтисодиёти 200 миллиард доллар зарар кўрди. Денгиз орқали юк ташиш нархи беш баравар ошди. Бу ҳақда The Economist хабар берди.
Миср энг катта ва тўғридан тўғри зарар кўрган, у Сувайш каналидан 7 миллиард доллар даромадни, яъни одатдаги даромаднинг тахминан учдан бир қисмини йўқотган. АҚШ ўз кемаларини ҳимоя қилиш учун 5 миллиард доллар сарфлаган.
Ҳусийлар 2024 йил давомида кемаларни Африкани айланиб ўтишга мажбур қилди. Осиёдан келадиган йўналишлар тахминан олти минг километрга чўзилди, йўл вақти 10-14 кунга узайди.
Америка разведкасига кўра, юқори тезликда узоқроқ сузиш ёнилғи сарфини ошириб, ҳар бир рейс нархига, тахминан, бир миллион доллар қўшди. Қизил денгизда юк ташиш учун суғурта тарифлари 20 баравар ошди.
Хитой ва Россия, аксинча, ғолиб чиқди, чунки ҳусийлар бу мамлакатларнинг кемаларига ҳужум қилмасликларини билдирди. Ҳозирда Сувайш канали орқали олиб ўтилаётган нефтнинг катта қисми Россияга тегишли. Кемачилик компанияларининг фойдаси ҳам ошди.
Умуман олганда, таъминот занжирлари Қизил денгизнинг кутилмаганда амалда блокадаси шароитида барқарорликни кўрсатди, дейилади хабарда.
АҚШ ва Исроил ҳарбийлари кемалари нишонга олинишига жавобан ҳусийларнинг ҳарбий объектлари ва тизимларига зарбалар бермоқда. Америка Қўшма Штатлари ва Исроилдан ташқари, денгиз кемачилигининг хавфсизлигини таъминлаш мақсадида операцияларда Ғарбнинг бошқа мамлакатлари, шу жумладан, Буюк Британия ҳам иштирок этди.
Яман ҳусийлари Исроил ҳудудини ва унга алоқадор кемаларни ўққа тутишни тўхтатди. Улар Исроил ва ҲАМАС ўртасида тузилган ўт очишни тўхтатиш тўғрисидаги битимга риоя қилишини таъкидлади. Ҳусийлар Исроилнинг “минтақадаги барқарорлик ва хавфсизликка таҳдид бўлиб қолаётгани”ни айтган.
Изоҳ (0)