Ўт очишни тўхтатиш бўйича мониторинг қўмитаси Исроилни зудлик билан барча қоидабузарликларни тўхтатишга ва ўз кучларини Ливан ҳудудидан олиб чиқишга мажбур қилиши керак, дея Ливан парламенти спикери Набиҳ Берри халқаро ҳамжамиятга мурожаат қилди.
“Ўт очишни тўхтатиш бўйича келишувнинг бажарилишини назорат қилиш ваколатига эга бўлган қўмита зудлик билан ўз мажбуриятларини бажариши ва Исроилни қонунбузарликларини тўхтатишга ҳамда босиб олинган Ливан ҳудудини тарк этишга мажбур қилиши керак. Уларнинг босиб олинган ҳудудда бўлиши шартномани тўғридан тўғри бузиш ҳисобланади”, дейди ливанлик сиёсатчи.
Беррининг таъкидлашича, 27 ноябрда ўт очишни тўхтатиш келишуви кучга кирганидан бери Исроил армияси келишувни 54 марта бузган. Беррининг сўзларига кўра, Исроил самолётлари ҳар куни Ливан ҳаво ҳудудини бузмоқда, Исроил техникаси эса чегарадаги аҳоли пунктларида Ливан фуқароларининг турар жой биноларини вайрон қилишда давом этмоқда. Парламент спикери, шунингдек, Ливан ва “Ҳизбуллоҳ” ҳаракати ўз навбатида эришилган келишувларнинг барча бандларига амал қилаётганини таъкидлади.
26 ноябрь куни Исроил Ҳарбий-сиёсий вазирлар маҳкамаси Ливаннинг “Ҳизбуллоҳ” ҳаракати билан ўт очишни тўхтатиш ҳақидаги келишувни маъқуллаган эди.
Сулҳ мазмуни
Сулҳ Ливандаги БМТ муваққат кучлари кўмагида Ливан армиясининг жанубий чегара бўйлаб участкаларни босқичма-босқич назорат қилишни назарда тутади. Ўз навбатида, Исроил икки ой ичида Ливандан ўз ҳарбийларини олиб чиқиши шарт. “Ҳизбуллоҳ” БМТ Хавфсизлик кенгашининг 1701-резолюциясига мувофиқ Ливаннинг жанубидаги иштирокини тўхтатиб, Литани дарёсининг шимолидан чекиниши керак бўлади.
АҚШ президенти Жо Байден келишув Вашингтон ташаббуси билан эришилганини айтган.
АҚШ ва Франция келишув тўлиқ амалга оширилишини таъминлаш учун Исроил ва Ливан билан ҳамкорлик қилишга ваъда берди, деди Байден ва бошқа номаълум иттифоқчилар ҳам ёрдам беришини қўшимча қилди.
Изоҳ (0)