Исроил Мудофаа армияси бош штаби бошлиғи Герси Халеви 6 мартдан истеъфога чиқиш ниятини мудофаа вазири Исроил Кацга маълум қилди, деб ёзмоқда The Times of Israel.
Халеви 2023 йил 7 октябрда ҲАМАС Исроил чегарасини кесиб ўтганида мамлакат ҳарбийларининг “муваффақиятсизлиги” учун жавобгарликни тан олди. Бош штаб бошлиғининг айтишича, у 6 мартгача ҲАМАС ҳужумини текширишни якунлаш ва Исроил армиясини “келажакдаги вазифалар”га тайёрлаш ниятини билдирган.
Тергов натижалари бўйича ҳисобот тақдим этилади. Халеви қўмондонликни ўз издошига топширишини ҳам қўшимча қилди. The Jerusalem Post аниқлик киритишича, Халеви лавозимда икки йил-у икки ой фаолият юритганидан сўнг, вазифасини тарк этмоқда. Нашр, шунингдек, Халевининг октябрь ойидаёқ муваффақиятсиз мудофаа учун жавобгарликни ўз зиммасига олишга ваъда берганини эслатди.
Жорий йилнинг 20 январь куни Исроил армияси раҳбари Ғазо ва Ливанда янги операциялар режаларини тайёрлашни буюрди. Халеви, шунингдек, яқин кунларда Иордан дарёсининг Ғарбий қирғоғида аксилтеррор операцияларига тайёргарлик кўришга чақирди. Унинг айтишича, уларнинг мақсади террорчиларни Исроил тинч аҳолисига етиб бормасидан олдин қўлга олишдан иборат.
Аввалроқ Исроилнинг уч нафар вазири ҲАМАС билан эришилган келишувга норозилик сифатида истеъфога чиққан эди.
Миллий хавфсизлик вазири Итамар Бен-Гвир ўт очишни тўхтатиш битими тузилгандан сўнг истеъфога чиққанини айтди. У раҳбарлик қилаётган ўта ўнг қанот “Отзма Ехудит” партияси тегишли баёнот берди.
Бен-Гвир Исроил бош вазири Биньямин Нетаньяхуни “барча мафкуравий қизил чизиқларни кесиб ўтганликда” айблади. Вазир ҲАМАС билан келишувни “терроризмнинг тўлиқ ғалабаси” деб атади.
Шунингдек, Бен-Гвирнинг ҳамкасблари — мерос вазири Амихай Элиягу ва миллий барқарорлик бўйича вазир Исхак Вассерлауф истеъфога чиқди.
“Отзма Ехудит” ҳукмрон коалициядан чиққанини эълон қилди. Партия агар Исроилнинг ҲАМАСга қарши ҳарбий ҳаракатлари қайта тикланса ва тўлиқ ғалаба қозонилгунга қадар давом этса, ортга қайтишга тайёрлигини билдирди.
Битимни ҳукуматнинг яна бир аъзоси — молия вазири ва “Диний сионизм” партияси етакчиси Бэтсалел Смотрич танқид қилди. Нетаньяху иккала вазир билан ҳам учрашди. Шундан кейин Смотрич ҳукумат таркибидан чиқмасликка ваъда берди.
Изоҳ (0)