Insonlar uchun sartaroshxonaga borish dam olish va o‘zini tartibga keltirishning bir usulidir, ammo go‘zallik saloni sindromi (GSS) deb nomlanuvchi kamdan-kam uchraydigan holat borki, u sochlarni yuvish natijasida yuzaga kelishi mumkin.
Tadqiqotlarga ko‘ra, sartaroshxonalarda soch yuvdirganda bosh va bo‘yinning noqulay holatda turishi og‘riq, shikastlanish va juda og‘ir holatlarda insultga olib kelishi mumkin.
Go‘zallik saloni sindromi birinchi marta 1993-yilda amerikalik nevrolog Maykl Vayntraub tomonidan yoritilgan. U ba’zi bemorlarda sochlarini salonda yuvgandan keyin insult bilan bog‘liq alomatlar paydo bo‘lganini aniqlagan.
Insult — bu qon oqimining keskin kamayishi natijasida miyada qon aylanishining buzilishi. Kasallik tomirda tromb hosil bo‘lishi, yorilishi yoki qon ketishi tufayli yuzaga keladi. Ikkala holatda ham miyaga yetarli miqdorda kislorod yetib bormaydi, bu esa hujayraning shikastlanishiga yoki o‘limga olib keladi.
Go‘zallik saloni sindromining asosiy sababi sochlarni yuvishda bosh va bo‘yinni rakovinaning qattiq chetiga egishdir. Bunday noqulay holat, bo‘yinning uzoq shunday qolib ketishi yoki keskin harakatlar miyani qon bilan ta’minlaydigan yirik qon tomirlarini siqa boshlaydi. Insult ko‘pincha keksa odamlarda yoki gipertoniyasi borlarda kuzatilsa-da, go‘zallik saloni sindromi hatto yosh va sog‘lom odamlarda ham paydo bo‘lish ehtimoli yo‘q emas.
GSS kamdan-kam uchraydigan sindrom, ammo uning belgilarini bilish olish ziyon qilmaydi. Simptomlarga bosh og‘rig‘i, bosh aylanishi, ko‘z oldining xiralashishi, ko‘ngil aynishi, qayt qilish, bo‘yin og‘rishi, tananing bir tomonida zaiflik yoki falajlik kabilar kiradi. Bunday alomatlar darhol paydo bo‘lmasligi mumkin.
Quyidagi ehtiyot choralar GSS ning oldini olishga yordam beradi:
- Sartaroshdan sochingizni orqaga emas, balki oldinga egilgan holda yuvishni so‘rash;
- Agar buning iloji bo‘lmasa, bo‘yinning tagiga maxsus yostiq yoki rulon shakliga keltirilgan sochiqdan foydalanish;
- Keskin harakatlardan va uzoq vaqt davomida noqulay holatda qolishdan qochish.
Izoh (0)