Хавфли озиқ-овқат маҳсулотларини истеъмол қилиш оқибатида дунёда ҳар йили 600 миллионга яқин инсон жабрланади.
Бу ҳақида Жаҳон соғлиқни сақлаш ташкилоти маълумотларига таяниб Санитария-эпидемиологик осойишталик ва жамоат саломатлик қўмитаси бошқарма бошлиғи Абдураҳмон Исмоилов маълум қилди.
“Овқатдан заҳарланишнинг энг оғир тури бўлган ботулизм касаллиги ҳақида кўп эшитгансиз ва унинг келиб чиқишига аксарият ҳолларда уй шароитида тайёрланган консерва (мариновка) маҳсулотлари сабаб бўлаётганлигини ҳам эсингизга солиб ўтмоқчимиз.
Шу боис ҳам уй шароитларида тайёрланган консерва маҳсулотларини истеъмол қилиш оқибатида кўнгил айниши, безовталик, қўрқув, қайт қилиш, овознинг бўғилиши, нарсаларнинг иккита бўлиб кўриниши, кўз олдининг хиралашиши кабилар кузатилса дарҳол тиббиёт ходимига мурожаат қилинг ва зинҳор уй шароитида даволанишга уринманг.
Баъзан дастурхонга тортилган таомлар, ноз-неъматларнинг бир пайтнинг ўзида (иссиқ ва совуқ газаклар, салатлар, ширинликлар, таомлар ва ичимликлар) кўп миқдорда ёки аралаштириб истеъмол қилиниши ошқозон ичак фаолиятининг бузилишига, ейилган таомнинг қийин ҳазм бўлишига олиб келади”, деди Абдураҳмон Исмоилов.
Аввалроқ Соғлиқни сақлаш вазирлиги матбуот хизмати Янги йил куни қандай овқатланиш бўйича тавсиялар берганди.
Маълум қилинишича, жигар, буйрак ва ошқозоности бези касалликлари бор кишиларда нотўғри овқатланиш туфайли ушбу хасталиклар кучайиши эҳтимоли юқори.
“Содда қилиб айтганда, овқатга тўлган меъданинг ҳаракат функцияси сустлашади ва ошқозондаги озиқ моддаларнинг шира билан аралашуви қийинлашиб, ҳазм жараёни издан чиқади. Бу каби нохуш ҳолатларга барҳам бериш учун мутахассислар томонидан, аввало, овқатланиш тартибига қатъий риоя этиш ва кун давомида сабзавотли салатлар, ошкўклар, ҳўл мевалардан оз-оздан ейиш тавсия қилинади. Негаки, табиий маҳсулотлар тез ҳазм бўлади, боз устига, улар меъдамизга оғирлик қилмайди”, дейилади хабарда.
Изоҳ (0)