Шавкат Мирзиёев 16 январь куни инвестиция масалаларига бағишланган видеоселектор йиғилишида Сирдарё вилояти ҳокими Акмалжон Маҳмудалиевни лавозимидан озод этди.
Президент матбуот котибининг хабар қилишича, Бунга ҳудудида инвестицияларни жалб қилиш, қишлоқ хўжалигини ривожлантириш ва бошқа йўналишлардаги фаолиятда жиддий камчиликларга йўл қўйгани сабаб бўлди.
Шунингдек, 16 та туман ва шаҳар ҳокимларига ҳайфсан эълон қилинди. Булар Беруний, Қораўзак, Қўнғирот, Пешку, Янгиобод, Қамаши, Хонқа, Шовот, Ромитан, Деҳқонобод, Миришкор, Чироқчи, Нарпай, Нуробод ва Гулистон туманлари, Оҳангарон шаҳри. Уларда ҳокимлар инвестиция ва экспорт масаласини ўз ҳолига ташлаб қўйган.
Эндиликда инвестиция бўйича янги назорат тизими бўлиши белгиланди. Бунда бош вазир бу йилги 42 миллиард доллар хорижий инвестисия бўйича ойма-ой режани тасдиқлайди, вилоят, шаҳар ва туман ҳокимлари, тармоқ раҳбарлари ҳафтада икки кун инвестисия билан шуғулланади.
Мутасаддилар тинмай ҳудудларга бориши, тадбиркорлар билан учрашиши, масаласини жойида ҳал қилиши шартлиги кўрсатиб ўтилди.
Акмалжон Маҳмудалиев ҳақида
2022 йил ноябрда Шавкат Мирзиёевнинг тегишли фармони билан Акмалжон Маҳмудалиев зиммасига Сирдарё вилояти ҳокими вазифасини бажариш юклатилганди. 2023 йилнинг апрелида Сирдарё вилояти ҳокими лавозимига тасдиқланганди. 2025 йил январида Акмалжон Маҳмудалиев бошқа ишга ўтиши муносабати билан ўрнига янги ҳоким тайинланиши кутилаётгани ҳақида хабарлар тарқалганди. Ҳокимлик буни рад этганди.
Изоҳ (0)