Сирдарё вилояти ҳокими Акмалжон Маҳмудалиев журналист ва блогерлар учун доимо очиқ эканини, уларни қизиқтирган ҳар қандай саволга жавоб беришга тайёрлигини маълум қилди. Бу ҳақда хабар берган “Дарё” журналистига кўра, бугун, 16 декабрь куни Сирдарё вилояти ҳокимлиги ташаббуси билан медиа-тур ташкил этилиб, унда вилояти ҳокими республикада фаолият юритувчи журналист ва блогерлар билан юз кўришган. Ҳамда ҳудудда амалга оширилаётган ишлар ҳақида шахсан маълумот бермоқчилигини билдирган.
Ҳақиқий ҳолатни кўрсатишда, албатта, сиз журналист ва блогерларнинг ўрнингиз катта. Айниқса ривожланаётган давлатларда бу жудаям керакли ҳисобланади. Шунинг учун бизнинг мақсадимиз ҳам сиз орқали Сирдарё вилоятида ислоҳотлар қандай бўй кўрсатаётганини халққа, жамоатчиликка кўрсатиб беришдан иборат, — дейди вилоят раҳбари.
Сирдарё ҳокими журналистлар билан мулоқот қилар экан, ОАВ вакиллари учун доимо очиқ эканини таъкидлаган.
Мен журналист ва блогерлар учун доимо очиқ бўлганман ва уларни қизиқтирган саволларга жавоб беришга тайёрман. Бугун медиа-тур давомида қишлоқ хўжалиги, инвестиция, иқтисодий йўналишларда қандай ишлар амалга оширилаётгани билан ҳам танишишингиз мумкин, — деди Акмалжон Маҳмудалиев.
Дастлаб Сирдарё туманидаги “Пенг-Шенг” Ўзбекистон-Хитой қўшма корхонаси фаолияти билан танишган журналистларга корхона негизида ташкил қилинган “АWP” ва “Пенг Шенг чарм” корхоналари, Оқолтин туманидаги “Агромарказ” фаолияти таништирилган.
Маълумот берилишича, Ўзбекистон-Хитой қўшма корхонаси 2009 йилда иш бошлаган бўлиб, умумий қиймати 26 миллион доллар бўлган. Лойиҳанинг бугунги инвестицион имконияти 100 миллион долларга чиққан.
Янги иш ўринлари икки мингдан ошди. Аввалига фақатгина керамик кафель ишлаб чиқарилган бўлса, эндиликда сантехника маҳсулотлари, қайта ишланган ва ишлов берилган терилар, декор панеллари, томчилатиб суғоришда фойдаланиладиган елим қувурлар, махсус сув ўтказгичлар, плёнкалар, аёллар ва эркаклар пойабзаллари, чарм буюмлар каби ўндан зиёд лойиҳалар ишга туширилди.
Ишлаб чиқариш майдони 100 гектарга етказилиб, маҳсулотлар экспорти МДҲ давлатлари, Хитой ва Европагача чўзилди. Аҳамиятлиси, жорий йилнинг апрель ойида давлатимиз раҳбари ушбу корхонанинг қиймати 10 миллион доллар бўлган 2 та янги лойиҳасига ҳам шахсан старт берди. Улар мармар тошларидан 40 турдаги тайёр маҳсулот ва терининг чиқиндига чиқариб юбориладиган “оксил” қисмидан желатин ишлаб чиқаришдир, — дейди ОАВ вакилларига ахборот берган вилоят ҳокимлиги ахборот хизмати раҳбари Зафар Мирраҳимов.
Медиа-тур давомида қўшимча қилинишича, “Пенг Шенг чарм” корхонасининг терини қайта ишлаш ва желатин ишлаб чиқириш лойиҳасининг умумий қиймати 4,2 миллион долларга тенг. Йилига 1500 кв/метр турли хил ўлчамдаги табиий чарм ҳамда 468 минг килограмм желатин маҳсулотлари ишлаб чиқарилади. Ишлаб чиқарилган маҳсулотлар Хитой ҳамда МДХ давлатларига экспорт қилинмоқда.
Медиа турдан сўнг, вилоят ҳокими Акмалжон Маҳмудалиев иштирокида журналист ва блогерлар учун матбуот анжумани ташкил этилиши режалаштирилган.
Изоҳ (0)