Сирдарё ҳокими бир нечта масъулларни маънавиятсизликда айблаб, улар ишдан олинишини айтди

Сирдарё вилояти ҳокими Акмалжон Маҳмудалиев вилоятдаги бир нечта раҳбарларни президентнинг маънавиятга оид топшириқлари ижросини таъминламасликда, маънавиятсизликда айблаб, улардан бир нечтаси ишдан олинишини айтди. Бу ҳақда ҳоким 2023 йилнинг 6 февраль куни вилоят ҳокимлиги биносида бўлиб ўтган йиғилишда гапирган. 

Ноинсоф ташкилот раҳбарлари маънавиятга бееътибор бўлгани учун аризасини оламан. Неча марта огоҳлантириш бердик, атайлаб кузатиб юрибман, — дейди масъулларни койиган ҳоким. 

Ҳоким йиғилиш давомида барча ўринбосарларига юзланиб, уларни ҳам топшириқлар ижросини назорат қилмасликда айблаган. 

Маънавият нима эканини тушунмаяпсанларми? Айб иш қилиб қўйган боладек ерга қараб тураверасан, ноинсоф. Президентнинг маънавият бўйича куйиб-пишиб гапирган гаплари, топшириқлари ижросини таъминламайсан. Кунлик мониторинг қилиб, мана буни қилиб қўй. Эй, оддий йилнинг номини ёзмаган ноинсоф, — дейди ҳоким ўринбосарларини танқид қилар экан. 

Акмалжон Маҳмудалиев вилоят ташкилоти раҳбарлари орасида маънавиятга доир топшириқни уддалаганларни олқишлаб, уларга раҳмат айтди. 

Пединститутга раҳмат, спорт бошқармаси ва санитарияга раҳмат, қолган ҳаммасида қизили бор, — дейди ҳоким. 

Сирдарё ҳокими йиғилиш давомида масъулларнинг бирига “Ватанпарвар” ташкилоти вилоят кенгаши раиси Улуғбек Имомқуловни, вилоят “Бозорсавдо” уюшмаси раиси Ҳамид Сайдалиевни лавозимидан олиш ҳақида топшириқ беради. Янгиер шаҳри ҳокими Отабек Носиров ва унинг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Жасур Эгамбердиевга ҳайфсан берилишини айтади. 

Молия бошқармаси, нима, ўлиб қоласанми ўзинг пулнинг тепасида ўтириб, бир дона газетага ёки журналга обуна бўлолмайсан, ноинсоф, — дейди вилоят раҳбари. 

Сирдарё ҳокими йиғилиш сўнгида маънавиятга доир президент топшириқларини бажармаслик ишдан олинишга сабаб бўлишини эслатади.