Президент Шавкат Мирзиёев кеча, 8 май куни Мудофаа вазирлигининг Марказий ҳарбий клиник госпиталига бориб, Иккинчи жаҳон уруши қатнашчилари ҳолидан хабар олгани, сирдарёлик отахон билан суҳбатлашиб, унинг илтимосига биноан отахонга уй совға қилмоқчилиги маълум бўлганди.
“Дарё” боёвутлик 101 ёшли отахон Ўскан ота Ҳожиманов билан суҳбатлашиб, унинг давлат раҳбари билан учрашувидан кейинги таассуротлари билан қизиқди.
-4kWuOPhY.jpg)
Уйим йўқ, дедим. Гулистондан битта уй берсангиз, дедим. Бир ўзим қолганман. Кампирим йўқ. Гулистондан бир уй олиб беришса, кампир топиб, бирга яшайманми? Болаларнинг қўлида яшагач, жуда ноқулай бўлар экан. Бир-бири билан тортишган куни бор, бир хил бўлмас экан. Шуларни кўриб, сиқилар экансан. Шунинг учун президентимизга Гулистондан менга битта уй беринг, мен келиб олай, дедим. Ўзимнинг аравамни ўзим тортайин, — дейди 101 ёшга кирган Ўскан ота.
Сирдарё вилояти ҳокимлиги ахборот хизмати раҳбари Зафар Мирраҳимовнинг “Дарё”га маълумот беришича, вилоят ҳокими Акмалжон Маҳмудалиев президент топшириғидан сўнг, отахонга 2 хонали уй совға қилган.
Бугун, 9 май куни Мудофаа вазирлигининг Марказий ҳарбий клиник госпиталига келган Сирдарё вилояти ҳокими отахон ва унинг яқинларига янги хонадон калитларини топширган.
Қўшимча қилинишича, Ўскан ота айни кунда Иккинчи жаҳон урушининг Сирдарё вилоятида яшаётган ягона иштирокчиси ҳисобланади.
Мен яшовчи “савхоз”да 80 нафар уруш қатнашчиси бор эди. Шулардан ҳозир фақат мен қолдим. Ҳаммаси ўтиб кетди, — дейди отахон.
Суҳбатдош президент Шавкат Мирзиёевнинг Иккинчи жаҳон уруши қатнашчиларига қаратаётган эътиборидан мамнунлигини айтмоқда.
Эътибор берганмисиз, Шавкат Мирзиёев президент бўлганида сочлари қоп-қора эди. Ҳозир халқнинг ташвиши сабаб сочлари оқариб кетибди. Халққа йўл кўрсатиш, унинг ташвиши билан яшаш қийин экан-да. Одатда икки болани тўғри йўлга солиш қийин иш. Шавкат Мирзиёев Ўзбекистонни бошқариб турибди, — дейди Иккинчи жаҳон уруши қатнашчиси.
Изоҳ (0)