“Халқнинг ўзи баҳо беради”. Сирдарё ҳокими ОАВга очиқлик борасида вилоят ҳокимлари рейтингида қайси поғонада туриши ҳақидаги саволга жавоб берди

Сирдарё вилояти ҳокими Акмалжон Маҳмудалиев вилоят ҳокимларининг Оммавий ахборот воситаларига очиқлиги борасидаги рейтингнинг қайси поғонасида туриши ҳақидаги саволга жавоб берди. Бу ҳақда вилоятда журналист ва блогерлар учун ташкил этилган пресс-тур якунидаги ҳоким ва ОАВ вакиллари ўртасидаги мулоқотда сўз борди. 

“Дарё” журналистининг хабар беришича, Акмалжон Маҳмудалиев 16 декабрь куни журналист ва блогерлар билан учрашиб, уларни қизиқтирган саволларга жавоб қайтарган. 

Вилоят ҳокими бўлишнинг ҳам ўзига яраша талаби, масъулияти ва ишончи бор. Энг каттаси ўзига яраша жавобгарлиги бор. Мен Сирдарё вилоятини бошқа вилоятлар билан солиштирмаган эканман. Ҳар бир ҳудуднинг ўзига яраша имконияти, ҳар бир раҳбарнинг эса алоҳида бошқарув услуби бор. Шу сабаб мен бу саволингизга жавоб беролмайман. Рейтинг, ҳокимларни солиштириш масаласини халқнинг ўзи яхши билади. Халқнинг ўзи баҳо беради, — дейди вилоят раҳбари. 

Сирдарё ҳокимининг таъкидлашича, у Ўзбекистон бўйлаб хизмат сафарларида бўлганида барча вилоят ва туманларда ўзгариш бўлаётганига, масъуллар халқ учун ишлаётганига гувоҳ бўлган. 

Президентимизнинг вилоят ҳокимлари ва туман ҳокимларига бераётган топшириқлари ижроси бўлмоқда. Вилоят ҳокимлари билан ўзимни солиштириш хаёлимга ҳам келмаган экан, тўғриси. Лавозимда ишлаётган одам ўзига ўзи баҳо беролмайди. Баҳони халқ берсин, — дейди Акмалжон Маҳмудалиев. 

Сирдарё ҳокими аввалроқ барча ОАВлар учун доимо очиқлигини айтиб, журналист ва блогерларни қизиқтирган саволларга жавоб беришга тайёрлигини маълум қилганди.