Россияда оғир шароитда ишлаб келган ўзбек мигрантлари — она ва унинг уч қизи Ўзбекистонга қайтарилди. Уларга уй совға қилинди 

Россияда оғир шароитда яшаб, уч нафар қизи билан меҳнат қилиб келган сирдарёлик оила Ўзбекистонга қайтарилди. Ва уларга янги уй совға қилинди. Бу ҳақда “Дарё”га Сирдарё вилояти ҳокимлиги ахборот хизмати хабар берди. 

Маълум бўлишича, она ва унинг қизлари президентнинг давлат хизмати, аҳоли билан мулоқот ва маҳаллий ҳокимият органлари фаолиятини мувофиқлаштириш масалалари бўйича маслаҳатчисининг биринчи ўринбосари Қаҳрамон Қуронбоев бошчилигидаги делегация ёрдами билан Ватанга қайтган. 

Вилоятнинг Янгиер шаҳридаги “Абдураҳмон Жомий” маҳалласида истиқомат қилувчи Дилафрўз Усмонова Россия Федерациясида фарзандлари — 14 ёшли қизи Маржона, 13 ёшли Дурдона ва 11 ёшли Зумрадлар билан оғир шароитда меҳнат қилиб келгани президентнинг давлат хизмати, аҳоли билан мулоқот ва маҳаллий ҳокимият органлари фаолиятини мувофиқлаштириш масалалари бўйича маслаҳатчисининг биринчи ўринбосари Қаҳрамон Қуронбоев бошчилигидаги делегация эътиборни тортган ва улар ёрдамида ватанга қайтарилди, — дейди ҳокимлик ахборот хизмати раҳбари Зафар Мирраҳимов.

Қўшимча қилинишича, ушбу оилага Янгиер шаҳар ҳокимлиги ҳомийлигида “Янги Ўзбекистон” массивидан янги хонадон совға қилинган. 

Ишчи гуруҳнинг Россияга боргани яхши бўлди. Менга қийин вазиятга тушиб қолганингизни айтиб беришди. Ҳаммаси ортда қолди. Биринчи мақсад қизларни яхши ўқитишимиз керак, — дейди ушбу хонадон вакиллари билан суҳбатлашган вилоят раҳбари Акмалжон Маҳмудалиев. 

Ушбу оила билан кўришган вилоят ҳокими уларга совға қилинган уй калитини расман топширган.