Сирдарё вилояти ҳокими Акмалжон Маҳмудалиев айни кунда фаолият юритаётган ҳокимлар аҳоли учун ўтказаётган сайёр қабулларда муаммога дуч келмаётганини, боиси ҳокимларга аҳоли муаммосини ҳал қилиш учун етарли даражада пул берилаётганини эслатиб, “Ҳозирги қабуллар маза, тўғриси, 2018 йилда ҳокимлар қабулларга борсак, қўрқиб борардик. Сабаби пул йўқ эди. Мурожаатчиларнинг ҳаммаси йўл қилиб бер, сув қилиб бер, мактаб ва боғча қилиб бер, “балнисам” ёмон дейишарди. Ўша ишларни қилишни истардик, аммо пул йўқ эди. Ҳозир пулда муаммо йўқ-ку”, деди.
Сирдарё вилояти ҳокимлиги ахборот хизмати раҳбари Зафар Мирраҳимовнинг “Дарё”га билдиришича, ҳоким юқоридаги гапларини 2025 йилнинг 13 январь куни таътилдан қайтганидан кейинги биринчи аппарат йиғилишида гапирган.
Вилоят раҳбари раислигидаги мазкур йиғилишда ҳудуднинг иқтисодий, ижтимоий, қурилиш, инвестиция, туризм ва қишлоқ хўжалиги соҳасида қилиниши лозим бўлган вазифалар тўғрисида гап борган. Давлат раҳбарининг 2024 йил 14 март куни вилоятнинг Сайхунобод туманига ташрифи пайтидаги топшириқлар ижроси ҳамда ижро интизоми ҳақида сўз юритилган.
Битта нарсани билинглар, бугун қолган ишга қор ёғади. Сектор раҳбарлари мана ўн кун маза қилиб дам олдингиз. Қолган ташкилотлар ҳам, марҳамат биз билан келишиб, ўрнингизга ўринбосарингизни қўйиб, бир йилда бир марта олинадиган таътилингизни олинг. Менинг эътирозим йўқ. Соғлиғингизни тикланг”, дейди Акмалжон Маҳмудалиев тўртта сектор раҳбарларининг таътилдан қайтганини айтар экан.
Ҳокимнинг аниқлик киритишича, вилоятдаги ҳокимлик ва ташкилотларда 177 нафар масъул ходим фаолият юритади.
Ҳозир залда 177 нафар масъул ўтирибди. Бу ерда бир миллионга яқин одам, бутун вилоятнинг ўн битта шаҳар ва туманларида яшаётган одамларнинг келажагини, иқтисодиётини, ижтимоий ҳолатини ҳал қиладиган одамлар ўтирибди. Кичкина одамлар ўтиргани йўқ. Ҳаммасининг қанақадир шунга улуши бор. Энди нима учун айримлар шу ишига виждонан ёндашмайди?, дейди ҳоким.
Акмалжон Маҳмудалиев жамоасига мурожаат қилар экан, масъулларга фидойилик кераклигини айтиб, “президентимизнинг ишончини оқлаш керак”, деди.
Изоҳ (0)