Саёҳат кишини таваккал қилиш, кези келса мустақил қарор қилиш ва аввал ҳис қилиб кўрмаган туйғуларни туйиш имконини беради. Бу нафақат катталар, балки болалар руҳиятига ҳам таъсир қилади. Болалар психологларининг таъкидлашича, саёҳат ва саргузаштлар ҳақидаги мультфильмлар болаларнинг ўзига бўлган ишончининг ошишига ҳисса қўшади: ўғил ёки қиз қаҳрамонларга тақлид қилади, улар каби юксак марраларни забт этиш ва олдига мақсад қўйиш истаги пайдо бўлади.
«Йўқотилган ришта»
2019 йилда тақдим қилинган мазкур мультфильмни томоша қилиш жараёнида қаҳрамонлар, хусусан, Қор одамнинг Ҳимолайга саёҳати ва саёҳат давомидаги саргузаштларига гувоҳ бўлиш мумкин.
«Волт»
2008 йилда экран юзини кўрган «Волт» мультфильмида эса оқ ит, қора мушук ва оловранг оғмахон Американинг бир томонидан бошқа бир тарафга саёҳатга отланади.
«Мадагаскар-3»
2012 йилда тақдим қилинган «Мадагаскар»нинг учинчи қисмида эса ҳайвонлар Африкадан бошлари оққан томон ҳаракатланади ва йўл-йўлакай бир-биридан қизиқарли ҳодисаларга дуч келади.
«Жирафа»
2011 йилда мухлислар эътиборига ҳавола этилган мультфильми эса африкалик Мако исмли болакай ва унинг дўсти жирафанинг Париждаги саёҳатини ўзида мужассам этган. Мультфильмнинг реал воқеалик асосида суратга олингани эса унга бўлган қизиқишнинг янада ортишига сабаб бўлади.
«Шимолга элтувчи узоқ йўл»
2015 йил экран юзини кўрган мазкур мультфильмда петербурглик Саша исмли қизалоқ шимолий-қутбга саёҳатга отланади. Саргузаштларга бой бўлган ижод маҳсули қутбдаги ҳаёт ва ундаги ўзига хосликларни очиб бериши билан нафақат болалар, балки катталарга ҳам бирдек қизиқарли бўлишига шубҳа йўқ.
«Анастасия»
1997 йилда тақдим қилинган мультфильм сюжетига кўра, Настя исмли қиз Парижга саёҳат қилади. Ўз севгиси ва содиқ дўстларни учратиш билан бирга, бир қанча саргузаштларни ҳам бошдан кечиради.
«Этик кийган мушукнинг дунё бўйлаб саёҳати»
Жюл Верннинг асари бир неча марта экранлаштирилганига қарамай, улар орасида мультфильм у қадар кўп эмас. 1976 йилда япониялик ижодкорлар томонидан аниме кўринишида тақдим қилинган версия эса ўзига хослиги билан кўплаб мухлислар қалбидан жой олган. Унда этик кийган бош қаҳрамон мушук дўстлари билан дунё бўйлаб сафарга отланади.
«Дунё бўйлаб 80 кун»
Классикани ошуфтаси бўлган, аммо фарзандлари Жюл Вернни фақат мушуклар ҳақида ёзган экан деган хаёлга боришини истамаганларга 1972 йилда суратга олинган ҳамда Филеас Фогг ҳақида ҳикоя қиладиган мультфильми томоша қилиш тавсия қилинади. 16 қисмдан иборат мультфильмдаги қаҳрамоннинг саргузаштлари сиз ва болаларингизни зериктирмаслиги аниқ.
«Моана»
2016 йилда тақдим қилинган ва Гавайи оролларида яшайдиган мард ва жасур Моана исмли қизнинг саргузаштлари эса ҳеч кимни бефарқ қолдирмайди, томошабинни экран қаршисига михлаб қўяди.
«Юқорига»
2009 йилда экран юзини кўрган мультфильмни томоша қилган каттаю кичик саёҳатга отланиш учун ҳеч қачон кеч эмаслигини тушуниб етади.
«Элдорадo сари йўл»
2000 йилда тақдим қилинган мультфильм қаҳрамонининг қўлига шаҳар чакалакзорларидаги йўқолган хазинанинг харитаси тушиб қолади. Воқеалар ривожи давомида хазинани қидиришга отланган қаҳрамоннинг саргузаштларини кўриш мумкин бўлади.
«Атлантида: йўқотилган империя»
Инсоният билан боғлиқ сирларни яхши кўрадиган ва болаларини ҳам қизиқтиришни истайдиганларга 2001 йил тақдим қилинган мультфильмни томоша қилиш тавсия қилинади.
Мавзуга доир:
- Disney компанияси 7 ёшга кирмаганларга «ирқчилик»ка оид саҳналар мавжудлиги сабабли баъзи мультфильмларни кўришни чеклаб қўйди
- «Чебурашка. Байрам сири» 3D-мультфильмининг илк тизери намойиш этилди
- «Крудслар оиласи 2» мультфильми бир ҳафта ичида яна 3 млн доллар тўплаб, Америка прокатида биринчи ўринни эгаллади
Изоҳ (0)