АҚШ кинотеатрларининг 2016 йилдаги тушуми 11 млрд долларга баҳоланди

АҚШда 2016 йили кинодан келадиган касса тушумлари ўтган йили қайд этилган рекорд сумма — 11,1 миллиард доллардан ошмаса-да, ушбу рақамдан бироз ортда қолиб, 11 миллиард долларни ташкил этиши мумкин. Бу ҳақда «Интерфакс» хабар беради. 

Киноижарада айрим сиквеллар, жумладан, «Тошбақа-нинзалар 2» ва «Мустақиллик куни. Тикланиш» фильмлари муваффақиятсизликка учраган бўлса-да, Америка киностудиялари йил бошидан 26 июнга қадар 5,48 миллиард доллар ишлаб топди. Бу эса ўтган йилнинг шу даврига нисбатан 1,8 фоизга кўп. Тушум борасида ушбу сумманинг учдан бирига эга бўлган Disney киностудияси етакчилик қилмоқда.

«BoxofficePro.com» экспертлари тахминига кўра, АҚШда йилнинг иккинчи ярмидаги тушумлар 5,5 миллиард долларни ташкил этиши мумкин. Бунга йил якунига қадар экранларга чиқадиган «Қувғинди» («Юлдузли жанглар» туркумидан), «Жонига қасд қилувчилар отряди», «Доктор Стренж», «Ақл бовар қилмас махлуқлар ва улар қаерда истиқомат қилади» фильмлари, «Уй ҳайвонларининг махфий ҳаёти» ва «Моана» мультфильмлари, Мэтт Дэймон бош ролни ижро этадиган агент Борн ҳақидаги янги фильм ўз ҳиссасини қўшиши кутилмоқда.