Американинг Walt Disney киностудияси ўзининг 100 йиллик юбилейи муносабати билан Once Upon а Studio деб ном олган қисқа метражли фильмни томошабинлар эътиборига ҳавола қилди. Унда компания томонидан ишланган мультфильмлардаги 500 дан ортиқ қаҳрамон иштирок этган. Фильм ABC телеканали орқали намойиш қилинди.
Фильм сюжетига кўра 1953 йилдан Walt Disney компаниясида иш бошлаган америкалик продюсер, аниматор ва рассом Барнетт “Барни” Меттинсон амалиётчилардан бири билан суҳбатлаша туриб, мультфильм қаҳрамонларининг “жонланиши”ни хоҳлаши ҳақида айтади.
Меттинсон ва ҳамкасби Disney офисини тарк этишлари билан девордаги суратлардан Микки Маус ва пари Дин-Дин чиқиб келади. Улар биргаликда студиянинг юбилейи муносабати билан суратга тушиш учун барча мультфильм қаҳрамонларини йиғиб чиқишади.
Мультфильмда Ариэль, Моана, Элза, Рапунсел, Тимон, Гуфи, Балу, Винни-Пух, Дональд Дак, Робин Уильямсон томонидан овоз берилган қаҳрамон Жин ва бошқалар кўриниш берган.
Фильмнинг энг сўнгги саҳналаридан бирида эса Микки Маус Uolt Disney портретига қараб, унга миннатдорчилик билдиради.
“Disney афсоналари” мукофоти совриндори Барнетт “Барни” Меттинсон 2023 йилнинг 27 февраль санасида вафот этган. Шу боисдан ҳам Трент Корри ва Ден Абрахам томонидан суратга олинган Once Upon а Studio фильмида аниматор хотирасига ҳурмат бажо келтирилган.
Қисқа метражли фильм илк марта ABC телеканали орқали эфирга узатилди. У тез орада кинотеатрларда “Эзгу орзу” мультфильмидан аввал ҳам намойиш этила бошлайди.
Изоҳ (0)