Ўзбекистонда 2025 йил учун давлат дастури лойиҳасида “Экофаол фуқаро” ҳаёт тарзини кенг тарғиб қилишга қаратилган “Бир миллион яшил оила” умуммиллий ҳаракати йўлга қўйилиши режалаштирилаётгани ҳақида хабар берилган эди. Экология вазирлиги кимларга “экофаол фуқаро” мақоми берилишига аниқлик киритди.
Ушбу мақом аҳолида экологик турмуш тарзини шакллантириш ва экологик маданиятини юксалтириш, инсоннинг табиат билан уйғунда яшаши ва ҳар кунлик ҳаётий фаолиятининг атроф-муҳитга таъсирини минимал даражага тушириш учун рағбатлантирувчи тизимни жорий қилишни назарда тутмоқда.
Қандай кишилар “Экофаол фуқаро” ҳисобланади?
Таклифга кўра, дарахт экадиган, жамоат транспортида ҳаракатланадиган, бир сутка давомида 10 минг ва ундан кўп қадам юрган, ортиқча вазнни камайтирган, чиқинди ташлашни камайтирган, пластикдан фойдаланишни камайтирган ва шахсий автомобилини электромобилга ўзгартирган кишилар “Экофаол фуқаро” ҳисобланади.
Шу билан бирга, улар уйига қуёш панели ўрнатиши, уй фасадини энерготежовчи материаллар билан қоплаши, электр ёритишни ҳаркатланиш датчигига ўтказиши ҳамда электр, газ ва сув таъминотини тежашга эришган бўлиши керак. Бундан ташқари, “экофаол фуқаро” бўлиш учун экология соҳасидаги жамоатчилик ишларида фаол иштирок этиш ҳам талаб этилади.
“Экофаол фуқаролар” қандай имтиёзларга эга бўлади?
“Экофаол фуқаро” мақомини олган кишилар давлат хизматларидан фойдаланишда чегирмаларга эга бўлади. Шунингдек, уларнинг истеъмол кредитлари фоиз ставкасига ҳам чегирмалар қўлланилади. “Экофаол фуқаролар”га велосипед, скутер каби экологик транспорт воситалари ҳам совға қилиниши таклиф этилмоқда.
Агар оиланинг барча аъзолари “экофаол фуқаро” мақомини олса, бу оилага “Яшил оила” мақоми берилади ҳамда ҳар йили лотерея орқали аниқланган оилаларга электромобиль совға қилинади.
Бундан ташқари, 50 фоиздан ортиқ оилалари “Яшил оила” бўлган маҳаллалар “Яшил маҳалла” мақомини олади. Яшил маҳаллаларга чиқинди йиғиш майдончаларини қуриш, ижтмоий объектларда чиқинди контейнерларини ўрнатиш, дарахтларни экиш ва суғориш, “яшил жамоат парки”ни яратиш учун зарур шароит яратилади. Бундан ташқари, “Яшил маҳалла”лар сони 50 фоиздан кўп бўлган шаҳарларга “Яшил шаҳар”, “Яшил қишлоқ” ва “Яшил овул” мақоми берилади.
Қандай натижага эришилади?
Вазирликка кўра, бир автомобиль йилига ўртача 4,6 тонна карбонат ангидриди газини атмосферага чиқаради. Кунига пиёда юриш натижасида эса ҳар бир одам 1,5 тоннагача ташлама ташлашининг олдини олади. Қолаверса, бир оилада 100 метр куб табиий газ ресурслари тежалса, бу атмосферага 2 тонна карбонат ангидриди гази чиқарилмайди дегани. “Яшил шаҳар”ларда яшил ва барқарор инфратузилмани ташкил этиш орқали эса хавфсиз ва масъулиятли туризм муҳити яратилади.
Изоҳ (0)