Ўзбекистон АҚШ билан стратегик шерикликни чуқурлаштиришни режалаштирмоқда. Бу ҳақда жамоатчилик муҳокамасига қўйилган 2025 йилга мўлжалланган давлат дастури лойиҳасида кўзда тутилган.
Унга кўра, ТИВ 2025 йил якунига қадар АҚШ билан янги даврдаги стратегик шериклик алоқаларини янада чуқурлаштириш чораларини кўришга масъул бўлади.
Олий даражадаги ташрифни ташкил этиш режалаштирилган. Шунингдек, Тошкент шаҳрида АҚШ билан кенгайтирилган стратегик шериклик мулоқотининг дастлабки раундини ўтказиш, “C5+1” формати доирасида ҳамкорликни фаоллаштириш, жумладан, вазирлар учрашуви, тегишли “ишчи гуруҳлар” йиғилишлари ҳамда ушбу формат ташкил топганлигининг 10 йиллик юбилей саммитини Самарқандда ўтказиш масалаларини ишлаб чиқиш кўзда тутилмоқда.
Лойиҳа билан Парламентлараро ҳамкорлик алоқаларини кенгайтириш, хусусан, Конгресс етакчи аъзоларининг Ўзбекистонга ташрифларини амалга ошириш ҳам режалаштирилган.
Америка қитъаси мамлакатларидан салоҳиятли инвесторларни Ўзбекистонга жалб қилиш, улар иштирокида турли бизнес-форумлар, кўргазмалар ва бошқа тадбирларни ташкил этиш орқали савдо-инвестициявий ҳамкорликни жадаллаштириш, АҚШ билан хавфсизлик ҳамкорлик алоқаларини кенгайтириш ҳам кўзда тутилган.
Бундан ташқари, АҚШ ҳукумати томонидан эълон қилинадиган инсон мезонига оид турли ҳисоботларда Ўзбекистоннинг юқори ўрнини сақлаб қолиш бўйича яқин ҳамкорлик алоқаларини давом эттириш режа қилинган.
Ушбу давлат билан таълим, илм-фан, соғлиқни сақлаш, атроф-муҳит ва бошқа соҳаларда алоқаларни кенгайтириш, хусусан, университетлараро ҳамкорлик, инглиз тилини ўқитиш, фан ва экология соҳаларида қўшма лойиҳаларни амалга ошириш ҳам кўзда тутилмоқда.
Ўзбекистон—АҚШ муносабатлари
АҚШ Ўзбекистон мустақиллигини 1991 йил 25 декабрда тан олган. 1992 йил мартда эса Тошкентда АҚШ элчихонаси очилган. 2002 йил мартида Вашингтонда ташкил этилган учрашувда Ўзбекистон ва АҚШ президентлари Стратегик ҳамкорлик ҳақида декларацияни имзолаган.
2018 йил 15—17 май кунлари Ўзбекистон президенти Шавкат Мирзиёевнинг АҚШга биринчи расмий ташрифи бўлиб ўтди ва унинг якунлари бўйича Ўзбекистон ва АҚШ ўртасидаги стратегик шерикликнинг янги даври бошлангани ҳақида қўшма баёнот қабул қилинди.
2020 йил октябрида “Хотин-қизлар, тинчлик ва хавфсизлик тўғрисида АҚШ—Ўзбекистон қўшма баёноти” қабул қилинганди. Унда Қўшма Штатлар учун Ўзбекистоннинг хотин-қизлар, тинчлик ва хавфсизлик бўйича Миллий ҳаракатлар режасини ишлаб чиқишда Ўзбекистон халқи билан ёнма-ён ишлаш катта шараф экани айтилганди. Баёнотнинг қабул қилиниши икки мамлакат ўртасидаги шерикликда яна бир ижобий қадам дея қайд этилганди.
АҚШ Ўзбекистоннинг энг йирик 10 та савдо ҳамкоридан биридир. Ўзбекистон-АҚШ савдо ҳажми 2024 йилда 773,3 миллион долларга етди. Сўнгги бир неча йил ичида Ўзбекистонда АҚШ капитали иштирокидаги корхоналар сони икки баробарга кўпайди.
Марказий Осиё мамлакатлари ва АҚШ етакчиларининг “C5+1” форматидаги биринчи саммити 2023 йил 19-сентябрь куни бўлиб ўтган. 2025 йилда иштирокчи мамлакатлар “C5+1” формати доирасидаги муваффақиятли ҳамкорликнинг ўн йиллигини нишонлайди.
Изоҳ (0)