Ўзбекистонда пластик чиқиндилар ҳосил бўлиши юзасидан хатлов ўтказилади — Давлат экологик экспертизаси маркази

Базел конвенцияси бўйича Экология вазирлиги амалдаги миллий меъёрий ҳужжатларни мувофиқлаштириш бўйича таклифлар ишлаб чиқади. Бу ҳақда Давлат экологик экспертизаси маркази ахборот хизмати “Дарё”га маълум қилди.

Хабарда айтилишича, Швейцариянинг Женева шаҳрида бўлиб ўтган “Хавфли чиқиндиларни чегаралараро ташиш ва йўқ қилиб юбориш устидан назорат қилиш тўғрисида” Базел конвенцияси очиқ ишчи гуруҳининг 14-йиғилишида Экология вазирлиги ҳузуридаги Давлат экологик экспертизаси мутасадди ходимлари иштирок этган.

Анжуманда электрон чиқиндилар, чиқинди қўрғошинли аккумуляторлар, ишлатилган ва чиқинди пневматик шиналар бўйича техник кўрсатмаларни қайта кўриб чиқиш ҳамда Базел конвенцияси ҳамкорлик дастури муҳокама қилинган.

Маълум қилинишича, семинар доирасида Ўзбекистонда қуйидаги ишлар амалга оширилади:

• Базел конвенцияси бўйича конференциялар доирасида қабул қилинган техник кўрсатма ва тавсиялардан келиб чиқиб, Экология вазирлиги томонидан амалдаги миллий меъёрий ҳужжатларга ўзгартириш киритиш, жумладан, халқаро стандартларга мувофиқлаштириш бўйича таклифлар ишлаб чиқиш;
• Ўзбекистонда пластик чиқиндилар ҳосил бўлиши юзасидан хатлов ишларини ташкил этиш, маҳаллий консултантларни жалб қилган ҳолда миллий қонунчиликни кўриб чиқиш ва пластик чиқиндиларни бошқариш соҳасида мавжуд ҳолат, муаммо ва амалга оширилиши лозим бўлган тадбирлар бўйича ҳисобот лойиҳаси тайёрлаш;
• пластик, ишлатилган автошиналар, аккумулятор, электрон ва тиббий чиқиндилар билан боғлиқ ишларни амалга оширишда идоралараро ҳамкорликни йўлга қўйиш чора-тадбирларини ишлаб чиқиш;
• чиқиндилар билан боғлиқ ишларни амалга ошириш соҳасида экологик маданият ва дунёқарашни юксалтириш, таълим тизимларида мазкур соҳада амалга оширилаётган ўзгаришлар тўғрисида хабардор қилиб бориш тизимини йўлга қўйиш.

Маълумот учун, Ўзбекистон мазкур конвенцияга Ўзбекистон Республикаси Олий Мажлисининг 1995 йил 22 декабрдаги 188-1-сонли “Хавфли чиқиндиларни чегаралараро ташиш ва йўқ қилиб юбориш устидан назорат қилиш тўғрисидаги Базел конвенциясига қўшилиш ҳақида”ги қарорига асосан қўшилган.