Ўзбекистонда яқин икки йилда барча коммунал хизматлар бир пакет сифатида, битта субъект томонидан тақдим этилади ва қарздорлик ҳам умумлаштирилади. Бу ҳақда “Миллий тикланиш” партияси раиси Алишер Қодиров маълум қилди.
Партия фракциясининг шу йил 9 декабрь куни бўлиб ўтган йиғилишида чиқиндиларни тўплаш ва олиб чиқишда тўлов интизомини мустаҳкамлашга қаратилган қонун лойиҳаси муҳокамаларга сабаб бўлган эди. Ушбу лойиҳада чиқинди тўловларидан қарзи бўлганларни SMS орқали хабардор қилиб бориш, қарздорлик вужудга келгани тўғрисида огоҳлантирилгандан кейин тўлов амалга оширилмаса, уларнинг электр энергияси учун тўловларини қабул қилишни вақтинчалик чеклаш назарда тутилган.
Депутатлар қонун лойиҳасини қизғин муҳокама қилиб, бу масалада алоҳида ўрганишлар олиб бориш, яъни янги киритилаётган тизимнинг жойларда ишлаши бўйича қўшимча маълумотлар зарурлигидан келиб чиқиб, лойиҳани кўриб чиқишни фракциянинг кейинги йиғилишига қолдирганди. Масъул идора вакиллари эътирозни қабул қилиб, тез кунларда ушбу масала бўйича қўшимча маълумотлар тақдим қилишга ваъда берганди. Фракция томонидан қўллаб-қувватланмаган қонун лойиҳаси палата ялпи мажлиси кун тартибига ҳам киритилмаган эди.
Фракция ташаббуси билан 12 декабрь куни ташкил этилган йиғилишда ушбу қонун лойиҳаси муҳокама қилинди. Масъул идора вакиллари чиқинди тўловларидан қарзи бўлганларни SMS орқали хабардор қилиб бориш, қарздорлик вужудга келганлиги тўғрисида огоҳлантирилгандан кейин тўлов амалга оширилмаса, уларнинг электр энергияси учун тўловларни қабул қилишни вақтинчалик чеклашни назарда тутувчи янги тизимнинг ишлаш тартиблари кўриб чиқилди. Чиқиндиларни тўплаш ва олиб чиқишда тўлов интизомини мустаҳкамлашига қаратилган янги тизим бежизга ишлаб чиқилмагани қайд этилди.
Маълумотларга кўра, маиший чиқиндиларни тўплаш ва олиб чиқиш бўйича аҳолига кўрсатилган хизматлар учун дебитор қарздорлик ҳозирда 596 миллиард сўмни ташкил этиб, йил бошига қараганда 115 миллиард сўм кўпайган. Қарздорликларни ундириш тўғрисидаги аризаларни судларга киритиш бўйича Экология, атроф-муҳитни муҳофаза қилиш ва иқлим ўзгариш вазирлигининг ҳудудий органларига юклатилган вазифа ҳам амалиётда ўз самарасини бермаяпти.
Фуқаролар алоҳида огоҳлантиришдан кейин ҳам чиқинди бўйича қарздорликни бартараф этмаса, чиқинди бўйича қарзини тўланмагунига қадар электр энергия бўйича тўловни амалга оширмаслик таклиф қилинмоқда.
“Ҳаммамиз ёруғ, иссиқ ва тоза яшашни истаймиз. Бу истагимизни таъминлаш учун минглаб ватандошларимиз тун-у кун ишлайдилар. Уларни ҳақини тўламаслик ҳаммага зарар”, дейди Алишер Қодиров.
Унинг таъкидлашича, чиқиндиларни тўплаш, сақлаш ва қайта ишлаш жамият саломатлиги учун ҳаётий масала. Нотўғри сақланаётган чиқинди полигони кимёвий қуролдек хавфли ва Ўзбекистонда 200 та шундай полигон бор. Чиқинди масаласи энг охирги, хавфли нуқтасига етиб келди. Тартиб бўлмаган тизимга инвесторлар миллиардлаб маблағини бермоқчи эмас, инвестицияларсиз эса тизимни ўзгартириб бўлмайди.
“Чиқинди ва электр тўловлари бир тизимга уланмоқда, навбат газ ва сув тўловларига. Мақсад ватандошга сифатли коммунал хизматини кўрсатишнинг самарали тизимини яратиш”, дейди Қодиров.
Унинг қайд этишича, сифатсиз хизмат учун чорани кескинлаштириш ҳам кўзда тутилади
Изоҳ (0)