Instagramда “Жасжан” номи билан танилган блогер Жасур Шодиев ҳожатхона қоғозлари билан экологияга зарар етказгани учун жаримага тортилди. Бу ҳақда Экология вазирлиги хабар берди.
Блогер ҳожатхона қоғозларини йиғиб, устига чиққани, остидан эса машина ўтиб кетаётгунча сакрагани акс этган видеони тармоқдаги саҳифасига жойлаган. Ҳаёт учун хавфли ҳолат акс этган видеодан сўнг блогер ҳар тарафга сочилган қоғозларни йиғмасдан кетган. Видео ижтимоий тармоқ фойдаланувчиларининг кескин эътирозларига сабаб бўлган.
Мазкур ҳолат Экология, атроф-муҳитни муҳофаза қилиш ва иқлим ўзгариши вазирлиги ҳамда Тошкент шаҳар ИИББ томонидан ўрганилган. Натижада Шодиев атроф-муҳитни ифлослантириб, белгиланмаган жойга чиқинди ташлаш билан боғлиқ ҳуқуқбузарликни қасддан, жамоавий содир этгани аниқланган.
Унга нисбатан Маъмурий жавобгарлик тўғрисидаги кодекснинг 91-моддаси 1-қисми билан баённома расмийлаштирилган. Ҳуқуқбузар базавий ҳисоблаш миқдорининг 5 баравари — 1 миллион 875 минг сўм миқдорида жаримага тортилган.
Таъкидланишича, аввал ҳам Шодиев томонидан шундай ҳуқуқбузарлик содир этилган. Ҳозирда ички ишлар органлари томонидан ҳолатга ҳуқуқий баҳо берилмоқда ва қатъий чоралар кўрилади. Блогернинг ҳамроҳлари шахсига ҳам аниқлик киритилмоқда, уларга ҳам қонуний чора кўрилади.
2025 йил “Атроф-муҳитни асраш ва “яшил” иқтисодиёт йили” деб эълон қилинган. Бу эса атроф-муҳитни муҳофаза қилиш энг муҳим масалалардан бири эканини англатади. Бу борадаги ҳар қандай ҳуқуқбузарлик қатъий жавобгарликка сабаб бўлади, дея таъкидлайди Экология вазирлиги.
Изоҳ (0)