Бугун 11 январь куни Тошкент метрополитенига яна янги тўрт вагонли 3 та замонавий метро поездлари олиб келинди. Бу ҳақида “Тошкент метрополитени” ДУК хабар қилди.
“Йўналишлардаги вақт интервалларини янада қисқартириш мақсадида, ушбу поездлар белгиланган йўриқномага асосан, 9-10 кун давомида техник синовдан ўтказилиб, сўнгра йўловчиларга хизмат қилиши учун йўналишларга чиқарилади.
Шунингдек, таъкидлаш лозимки, 2025 йил январь февраль ойларида яна 6 та метро поезди олиб келиниши режаланган. Бу режавий ишлар натижасида, метро вагон паркларини янгилаш ва белгиланган вақт интервалларини янада қисқартишга эришиш мақсад қилинган”, дейилади “Тошкент метрополитени” хабарида.
2024 йил 31 декабрь куни Тошкент метроси учун 3 та янги ҳаракат таркиби — 12 та метро вагони олиб келингани хабар қилинганди.
Транспорт вазирлиги берган маълумотга кўра, 2017 йилдан 2019 йилгача 36 та поезд эксплуатация қилинган. 2024 йилга келиб уларнинг сони 65 тага етказилди. 2025 йил якунига қадар яна 26 та замонавий таркиб харид қилиниши режалаштирилган.
Сўнгги вақтларда метро хизматига бўлган талаб кун сайин ортиб бормоқда. Тошкент метрополитени 16 декабрь куни биринчи марта бир кунда 1 миллион йўловчига хизмат кўрсатди.
Миллионинчи йўловчига жамоат транспортидан бир йил давомида бепул фойдаланиш имконини берувчи транспорт картаси совға қилинди.
Изоҳ (0)