Тошкент метроси Янги йил кечаси биринчи марта тунги соат 02:00 гача ишлайди. Бу ҳақда метрополитен матбуот хизмати хабар берди.
Пойтахт метрополитени 31 декабрь тонгги 05:00 дан 1 январь соат тунги соат 02:00 гача йўловчиларга хизмат кўрсатади. Яъни шу куни метро бекатлари иш вақти одатдагидан 2 соатга узайтирилади.
Қайд этилишича, қўшимча дам олиш кунларида метро поездларининг ҳаракат жадвали юзасидан режавий ишлар амалга оширилмоқда.
Сўнгги вақтларда метро хизматига бўлган талаб кун сайин ортиб бормоқда. Тошкент метрополитени 16 декабрь куни биринчи марта бир кунда 1 миллион йўловчига хизмат кўрсатди. Миллионинчи йўловчига жамоат транспортидан бир йил давомида бепул фойдаланиш имконини берувчи транспорт картаси совға қилинди.
2025 йил 1 январдан метрополитенда бир йўловчи қатнови учун чекланган тариф – 3 000 сўм этиб белгиланди. Бунда тўлов электрон тўлов тизими (транспорт ёки банк картаси) орқали амалга оширилганда ҳозиргидек ўзгаришсиз қолади — 1 700 сўм.
Бугунги кунда метрополитен линияларининг умумий узунлиги 71 километрга, бекатлар сони эса 50 тага етказилди. Тошкент метроси учун 2025 йилда 26 та поезд харид қилиниши режалаштирилмоқда.
Изоҳ (0)