22 декабрь куни Нью Йорк метросида ухлаб ётган йўловчини ўлдириш ва ёқиб юборишда айбланаётган 33 ёшли Себастьян Сапета судда ўзини айбдор эмаслигини айтди.
Associated Press нашрининг аниқлик киритишича, суд мажлиси 5 дақиқадан камроқ давом этган.
Тергов маълумотларига кўра, гватемалалик фуқаро 23 декабрь куни Бруклиндаги Кони Айленд Стилуэлл авеню метро бекатида вагонда 57 ёшли Дебрина Кавамни ўт олдиргич ёрдамида ёқиб юборган. Аёлнинг кийими ёниб кетгач, у ўз кўйлаги билан оловни янада кучайтирган. Шундан сўнг эркак метро вагонидан чиқиб, платформадаги ўриндиққа ўтирган ва ёнаётган аёлни кузатиб турган. Бу ҳолат воқеа жойига етиб келган полициячининг тана камераси томонидан қайд этилган.
Эркакни қўлга олишда полицияга қўнғироқ қилиб, уни поездларнинг бирида кўрганларини айтган мактаб ўқувчилари ёрдам берди.
Шундан сўнг полиция ходимлари гумонланувчини поездларда қидира бошлади ва уни Манхеттендаги машҳур Эмпаяр Стейт Билдинг осмонўпар биноси яқинида жойлашган “Геролд сквер” бекатида топишди. CBS News хабарига кўра, гумонланувчи 2018 йилда Гватемаладан АҚШга келган.
Ҳужумчи ва жабрланувчи таниш бўлмаган. Воқеа содир бўлишидан олдин улар бир-бирлари билан суҳбатлашмаган.
Айбловга кўра, Сапета видеода ҳақиқатан ҳам ўзи эканлигини тан олган. Бироқ, гумонланувчининг айтишича, у кўп ичади ва нима бўлганини эслай олмайди.
Иш бўйича навбатдаги суд мажлиси 12 мартга белгиланган. Айбланувчи муддатидан олдин озод қилиниш ҳуқуқисиз умрбод қамоқ жазосига тортилиши мумкин.
Изоҳ (0)