Тошкент метроси 2024 йил якунига қадар 209 млн йўловчига хизмат кўрсатиши кутилмоқда. Бу ҳақда “Тошкент метрополитени”нинг йўловчиларга йўллаган мурожаатида маълум қилинди.
Қайд этилишича, 2021 йил бир кунда 280-300 минг йўловчига хизмат кўрсатилган бўлса, 2024 йилда бу кўрсаткич 920-930 мингни ташкил қилмоқда. 2024 йил якунигача метродан фойдаланувчи йўловчилар сони бир кунда 1 млнга етиши кутилмоқда.
Шу билан бирга, 2021 йилда носозликлар ва тўхтаб қолиш ҳолатлари 138 тани ташкил қилгани, 2023 йилда бундай ҳолатлар сони 71 та қайд этилиб, 2 баробарга камайишига эришилгани маълум қилинди.
“Ҳозирда ушбу ҳолатларни тўлиқ бартараф этиш ва “хавфсиз транспорт” мақомига эришиш чоралари кўрилмоқда. Жорий йил якунидан бошлаб 48 та ва 2025 йил давомида яна қўшимча 56 дона замонавий метро вагонларини харид қилиш кўзда тутилган. Бунинг натижасида тасарруфдаги ҳаракат таркибларини янгиланишига ҳамда йўналишларда поездлар оралиқ интервалини қисқартиришга эришилади”, дейилади хабарда.
Мурожаатда йўловчилардан метрополитендан фойдаланиш қоидаларига амал қилишлари сўралган.
“Ҳаракатланиш вақтида ўзаро ҳурматни сақлаш, поезд ичидаги йўловчилар чиқиб кетгунига қадар кириш учун вагон эшиклари олдида турмаслик, манзилга келгач поезддан чиқиш учун имкон қадар тезроқ ҳаракат қилиш, вагон эшикларига суянмаслик, шахсий буюмларни вагон ва метро ҳудудида қолдирмаслик талаб этилади”, дея қўшимча қилинган мурожаатда.
Изоҳ (0)