Тошкент марказий (“Шимолий”) вокзалидан ҳаракатланувчи аксарият поездлар бир ой давомида “Жанубий” вокзалдан қатнаши тўғрисида хабар берилганди. “Ўзтемирйўлйўловчи”нинг маълум қилишича, 16-октябр санасидан бошлаб Тошкент марказий вокзали ўз фаолиятини аввалги жадвал бўйича бошлайди.
“Тошкент марказий вокзалидан қатновчи маҳаллий йўналишларга саёҳатни аввалгидек Тошкент марказий вокзалидан давом эттиришингиз мумкин”, — дейилади хабарда.
Яъни юқори тезликда ҳаракатланувчи “Афросиёб”, тезюрар “Шарқ”, “Насаф”, “Ўзбекистон” поездлари ва Тошкент—Волгоград—Тошкент йўналишида ҳаракатланувчи йўловчи поездлар аввалгидек Тошкент марказий вокзалидан ҳаракатланади. Шунингдек, ҳозирда Тошкент марказий вокзали ва Тўқимачи бекатидан ҳаракатланаётган шаҳарлараро Ҳожикент, Гулистон, Ангрен, Ховос, Бекобод йўналишларидаги поездлар 16-октябр санасидан бошлаб Тошкент “Жанубий” вокзалидан ҳаракатланади.
Эслатиб ўтамиз, 13—15-сентябр кунлари амалга ошириладиган бир қатор йўловчи поездлар ҳаракати техник сабабларга кўра бекор қилинганди. Октябр бошида эса Ўзбекистонда маҳаллий йўналишдаги поезд чипталари нархи 50 фоизга, “Афросиёб”ники эса 100 фоизга оширилиши маълум бўлган эди.
Сентябр охирларида президент Шавкат Мирзиёев ҳузурида темирйўл соҳасида ҳал қилиниши лозим бўлган асосий масалалар юзасидан йиғилиш ўтказилганди. Ўшанда “Ўзбекистон темир йўллари” холдингга айлантирилиши, шунингдек, “Ўзбекистон темир йўллари”нинг носоҳавий активларини сотиш вазифаси қўйилгани тўғрисида хабар берилганди.
Изоҳ (0)