Ўзбекистонда маҳаллий йўналишда қатнайдиган йўловчи поездлари чипталари нархи оширилади. Бу ҳақда “Ўзтемирйўлйўловчи” матбуот хизмати хабар берди.
Қайд этилишича, йўловчи поездлар чипта нархлари сўнгги марта 2018 йилда маҳаллий йўналишларда, 2019 йилда юқори тезликда ҳаракатланувчи “Афросиёб” электропоездида қайта кўриб чиқилган бўлиб, охирги 4-5 йил мобайнида тарифлар ўзгаришсиз қолиб келмоқда.
2019—2022 йиллар ва 2023 йилнинг тўққиз ойи давомида республикада иш ҳақи миқдори 2,4 баробарга, электроэнергия ва ёқилғи нархларининг, логистика ва транспорт харажатларининг сезиларли даражада ошгани, шунингдек, йўловчи вагон паркларини янгилаш, янги поездларни харид қилиш, темирйўл вокзалларини замон талабларига мос равишда сақлашни ҳисобга олган ҳолда чипталар нархига ўзгартиришлар киритилмоқда.
“Шу муносабат билан ‘Ўзбекистон темир йўллари’ АЖ йўловчи ташиш хўжалигидаги йўловчи чипталарни 2023 йилнинг 20-октябр санасидан маҳаллий йўналишлардаги йўловчи поездлари чипта нархларининг тариф қисми 50 фоизга, юқори тезликда ҳаракатланувчи “Афросиёб” электропоездлари чипталари тўлиқ нархининг 100 фоизга оширилишини маълум қилади”, — дейилади хабарда.
Сентябр охирларида президент Шавкат Мирзиёев ҳузурида темир йўл соҳасида ҳал қилиниши лозим бўлган асосий масалалар юзасидан йиғилиш ўтказилганди. Ўшанда “Ўзбекистон темир йўллари” холдингга айлантирилиши, шунингдек, “Ўзбекистон темир йўллари”нинг носоҳавий активларини сотиш вазифаси қўйилгани тўғрисида хабар берилганди.
Изоҳ (0)