Ўзбекистонда Наврўз байрами арафасида белгиланган дам олиш кунлари сабаб вилоятларга қўшимча поездлар қатнови йўлга қўйилади. Бу ҳақда “Ўзбекистон темирйўллари” матбуот хизмати хабар берди.
Қайд этилишича, ҳозирда темирйўл чипталари танқислиги вужудга келиш ҳолатлари кузатилмоқда. “Бунинг асосий сабаби темирйўл чипталарининг хамёнбоплиги ҳамда бошқа транспорт турларига нисбатан қулайлиги ва хавфсизлигидадир”, — дейилади хабарда.
Йўловчиларнинг талаб ва истакларидан келиб чиққан ҳолда темирйўлларнинг харакат жадвали ҳамда ички имкониятларни инобатга олиб, байрам арафасида йўловчиларга қуйидаги қулайликлар яратилди:
- 17 мартдан 22 мартга қадар Самарқанд—Тошкент—Самарқанд йўанлишида юқори тезликда ҳаракатланувчи 767/768-сонли “Афросиёб” электропоезди;
- 20-, 21 март кунлари Тошкент—Қарши—Тошкент йўналишида юқори тезликда ҳаракатланувчи 780/779-сонли “Афросиёб” электропоезди;
- 19-, 21 март кунлари Тошкент—Урганч—Тошкент йўналишида ҳаракатланувчи 156ф/155ф-сонли йўловчи поездлар қатнови йўлга қўйилди.
Бундан ташқари, 16 март кунидан 25 март кунига қадар Тошкент—Термиз—Тошкент, Тошкент—Урганч—Тошкент, Тошкент—Қўнғирот—Тошкент ҳамда Андижон—Хива—Андижон йўналишларидаги йўловчи поездларга қўшимча иккитадан бештагача вагонлар уланиши режалаштирилган.
Маълумот учун, 2023 йилнинг 1 март кунидан 15 март кунига қадар темирйўл транспорти орқали 345 154 нафар йўловчи ташилган.
Аввалроқ Самарқанд—Тошкент—Самарқанд “Афросиёб” электропоезди йўналишида қўшимча 6 та рейс қатнови, Тошкент—Қарши—Тошкент йўналишида қўшимча 2 та рейс қатнови йўлга қўйилиши ҳақида хабар берилган эди. Бундан ташқари, 20 мартдан бошлаб Шаҳрисабз—Самарқанд—Шаҳрисабз йўналишида тезюрар йўловчи поезд ҳаракати бошланади.
Изоҳ (0)