O‘zbekistonda 2025-yil 1-fevraldan boshlab temiryo‘l chiptalari narxi oshiriladi. Bu haqda “O‘zbekiston temir yo‘llari” AJ matbuot xizmati xabar berdi.
Qayd etilishicha, sohada temir yo‘l infratuzilmasi xarajatlari, elektr energiyasi, yoqilg‘i va transport xarajatlarini qoplash, shuningdek, yangi yuqori tezlikda harakatlanuvchi elektropoyezdlarni xarid qilish va yo‘lovchi vagonlari parkini yangilash, temiryo‘l vokzallari faoliyatini yangicha zamonaviy talablariga muvofiq olib borish va yo‘lovchilarga sifatli xizmat ko‘rsatish maqsad qilingan.
Shu sababli yuqori tezlikda harakatlanuvchi “Afrosiyob” elektropoyezdlarning VIP, biznes toifadagi chipta narxlari 25 foizga, ekonom toifadagi chipta narxlari 20 foizga hamda tezyurar yo‘lovchi poyezdlar “Sharq”, “Nasaf” va “O‘zbekiston” poyezdlarning chipta narxlari 30 foizga oshirilmoqda.
“Afrosiyob” elektropoyezdlarni chipta narxlari quyidagicha:
Toshkent—Buxoro
- VIP 994 000 so‘m;
- biznes 751 000 so‘m;
- ekonom 484 000 so'm;
Toshkent—Qarshi
- VIP 854 000 so‘m;
- biznes 634 000 so‘m;
- ekonom 406 000 so‘m.
Toshkent—Samarqand
- VIP 619 000 so‘m;
- biznes 450 000 so‘m;
- ekonom 294 000 so‘m.
Shuningdek, 2025-yil 1-fevraldan boshlab mahalliy yo‘nalishdagi (yotoqli) yo‘lovchi poyezdlar chipta narxining tarif qismi 10,5 foizga oshirmoqda.
Narxlar avval qanchaga oshirilgandi?
Prezidentning 2023-yil 10-oktyabrdagi “O‘zbekiston Respublikasi temiryo‘l transporti sohasini tubdan isloh qilish chora-tadbirlari to‘g‘risida”gi qaroriga muvofiq 2024-yil 1-yanvardan boshlab yuqori tezlikdagi va tezyurar poyezdlarda yo‘lovchilarni tashish xizmatlari tariflarini davlat tomonidan tartibga solish amaliyotidan voz kechish, shuningdek, ularni bozor tamoyillari asosida tartibga solish mexanizmiga o‘tish amalga oshirilgan.
2024-yil 20-yanvardan boshlab yuqori tezlikda harakatlanuvchi “Afrosiyob” elektropoyezdlari hamda “Sharq”, “Nasaf” va “O‘zbekiston” tezyurar poyezdlarining chiptalar narxi 20 foizga oshirilgandi. 15-maydan boshlab esa “Afrosiyob” elektropoyezdlarining chiptalar narxi ekonom klass 20 foiz, biznes klass 30 foiz va VIP klass 40 foiz miqdorda oshgandi.
2024-yil 1-iyuldan mahalliy yo‘nalishlardagi yo‘lovchi poyezdlar — “Nasaf”, “Sharq”, “O‘zbekiston” poyezdlari chipta narxlarining tarif qismi 25 foizga oshirilgandi.
Izoh (0)