“Поезд чипталарини чайқовчилар умуман олиб сота олмайди” — “Ўзтемирйўлйўловчи”

“Ўзтермийўлйўловчи” поезд чипталари чайқовчилар қўлига чиқиб кетгани боис чиптахоналарда чипта қолмагани айтилган хабарларга муносабат билдирди.

Қайд этилишича, мамлакатда анъанавий тарзда нишонланадиган байрамлар, қишки таътил, қолаверса, сайёҳлик мавсуми мобайнида темирйўл транспортига бўлган талаб ортмоқда. Темирйўл транспорти хавфсиз ва ишончлилиги боис, йўловчилар жўнаш муддатидан 1 ой ва ундан ҳам олдинроқ чипталарни харид қиляпти. “Шу боис, байрамлар арафасида чипталар етишмаслиги кўпчиликда нотўғри тушунча уйғотмоқда”, — дейилади муносабатда.

“Ўзтемирйўлйўловчи” имкониятидан келиб чиқиб, қўшимча йўловчи поездлар, қўшимча вагонлар ҳам қўйилаётганини маълум қилди.

“Бугунги кунда поезд чипталарини чайқовчилар умуман олиб сота олмайди. Чунки чипталар йўловчига шахсини тасдиқловчи ҳужжати асосида ёзиб берилади ва темирйўл вокзалларига киришда йўловчиларнинг чипталари замонавий ускуналар билан текширилади”, — дея таъкидланади хабарда.

Ҳозирда ҳар куни юқори тезликда ҳаракатланувчи 6 та “Афросиёб” поездининг 12 та қатнови амалга оширилмоқда. Республиканинг барча ҳудудларига эса 30 га яқин йўловчи поездлар қатнови йўлга қўйилган. Темирйўл транспорти орқали бир суткада 25 мингдан зиёд йўловчи ўз манзилига етказилади.

Йўловчиларга чипта харид қилишда қулайликлар яратиш мақсадида чипталарнинг электрон тарзда сотуви йўлга қўйилган. Чипталарни “uzrailwaytickets” иловаси ҳамда “Chipta.railway.uz” сайти орқали 45 кун олдиндан йўловчилар харид қилиб олишлари мумкин.

Эслатиб ўтамиз, Наврўз байрами кунлари ҳам йўловчиларни ташиш мақсадида Тошкент—Андижон—Тошкент йўналишида қўшимча 4 та рейс ҳаракати йўлга қўйилганди. Йўловчиларни ташиш мақсадида 6, 13, 20, 27 апрель кунлари 60/59-сонли Тошкент—Андижон—Тошкент йўналишида қўшимча 4 та рейс ҳаракати йўлга қўйилди.