“Ўзбекистон темир йўллари” АЖ ишчи гуруҳи ва Ўзбекистоннинг етакчи туроператорлари вакиллари ўртасида учрашув бўлиб ўтди. Бу ҳақда акциядорлик жамияти матбуот хизмати хабар берди.
Қайд этилишича, учрашув Ўзбекистоннинг сайёҳлик салоҳиятини, шунингдек, туроператорлар ўз хизматларини кўрсатишда дуч келаётган темирйўл транспорти соҳасидаги муаммоларни муҳокама қилиш ва ривожлантиришга бағишланди.
“Ўзбекистон темир йўллари”нинг биринчи ўринбосари иштирок этган йиғилишда туроператорлар хизматлар кўрсатишда дуч келадиган муаммоларини билдирган.
“Айтиб ўтилган асосий масалалардан бири поезд чипталари тақчиллигига қарши курашиш мақсадида яқинда жорий этилган “1 та паспорт – 1 чипта” тизимидир. Энди бошқа мижозлар шахсий сабабларга кўра саёҳатни бекор қилса, туроператорлар бошқа йўловчилар учун чипталарни қайта расмийлаштира олмайди”, — дейилади хабарда.
Илгари туроператорлар битта паспорт учун сотиб олинган барча чипталарни сайёҳларнинг якуний рўйхатига мувофиқ қайта расмийлаштириши мумкин эди. Бироқ янги қоидалар бунга йўл қўймайди. Мутахассисларнинг таъкидлашича, чипталарни сотишнинг белгиланган қоидаларига кўра, фақат алоҳида ҳолларда чиптани бошқа шахсга қайта расмийлаштириш мумкин, лекин гуруҳлар учун эмас.
Шунингдек, эрта брон қилиш муаммоси ҳам муҳокама қилинган. Кўпгина сайёҳлар ўз саёҳатларини чипталар сотувга чиқарилишидан анча олдин режалаштиради (чипталар жўнаш кунидан 45 кун олдин сотилади), бу эса туроператорлар учун қийинчиликлар туғдиради.
Шунингдек, туризмни ривожлантиришда муҳим ўрин тутадиган темир йўл инфратузилмасини ривожлантириш масалалари муҳокамаси ҳам учрашувнинг асосий мавзуларидан бири бўлган. “Ўзбекистон темир йўллари” акциядорлик жамияти раҳбарияти темир йўл тармоғини модернизация қилиш ва кенгайтириш, шунингдек, қатнов сифати ва қулайлигини ошириш мақсадида янги поездларни харид қилиш ва жорий этиш бўйича ўз режалари билан таништирган.
Эслатиб ўтамиз, сентябрь охирларида президент Шавкат Мирзиёев ҳузурида темирйўл соҳасида ҳал қилиниши лозим бўлган асосий масалалар юзасидан йиғилиш ўтказилганди. Ўшанда “Ўзбекистон темир йўллари” холдингга айлантирилиши, шунингдек, “Ўзбекистон темир йўллари”нинг носоҳавий активларини сотиш вазифаси қўйилгани тўғрисида хабар берилганди.
Изоҳ (0)