“Дарё” нашрида “Билетлар қўлга чиқиб кетади”. Вилоятларга қатновчи поездлар чипталарини яширин сотиш ҳолатлари кўплиги айтилмоқда” номли материал эълон қилинган эди. Унда Facebook фойдаланувчилари томонидан Ўзбекистон темирйўл кассаларидан чипта сотиб олишда муаммолар юзага келаётгани, рейслар сони камлиги ва поездларнинг оралиқ интервали узунлиги юзасидан билдирилган фикрлари жамланган.
Фаолларнинг сўзларига кўра, кўпчилик ўзи истаган вақтга поездларга чипта топа олмайди. Доим чипта тамом бўлгани ёки етишмаслиги муаммоси бўлади.
“Кассирга бориб, устига қўшиб берсангиз, дарров топиб беради. Фамилия-исм ёзмайди. Брон қилиб, олдириб қўяди. Бегона сўраса, билет йўқ. Таниш-билишларга устини олиб беради. Яқинда ишим тушиб билдим. Тўртта билет олиб берди танишим”, — дейилади мақолада.
“Ўзтемирйўлйўловчи” АЖ ахборот хизмати мазкур материалга муносабат билдирди. Унда темирйўл транспортидан фойдаланишда йўловчилар жўнаш муддатидан 1 ой ва ундан ҳам олдинроқ чипталарни харид қилишаётгани, шу боис байрамлар арафасида чипталар етишмаслиги кўпчиликда нотўғри тушунча уйғотаётгани айтилган.
“Бугунги кунда поезд чипталарини чайқовчилар умуман олиб сотолмайди. Чунки чипталар йўловчига шахсини тасдиқловчи ҳужжати асосида ёзиб берилади ва темирйўл вокзалларига киришда йўловчиларнинг чипталари замонавий ускуналар билан текширилади”, — дейилади “Ўзтемирйўлйўловчи” АЖ муносабатида.
Аммо “Ўзтемирйўлйўловчи” жамияти “Дарё” нашрида кўтарилган асосий масала — чипталарни кассирлар томонидан банд қилиб қўйилиши ва қанчадир ҳақ эвазига ёки танишлар орқали чипта “топилиб қолиши” юзасидан билдирилган фикрларга жавоб бермаган.
Изоҳ (1)
Брон деган нарсани олиб ташлаш кере кассалардан. А то умуман билет олиб булмейди через онлайн. Или онлайнни учириш кере раз так буладиган булса. Канча жойлар буш кетади итак. Зарарку темир йулни узига йуловчисиз кетса. Кассирни чунтагини уйласа Темир йул тушум тушиб кетаверади.