Ўзбекистоннинг Покистондаги элчиси Алишер Тўхтаев ушбу мамлакат Давлат банки раиси Жамил Аҳмад билан учрашув ўтказди. Бу ҳақда “Дунё” АА хабар берди.
Маълум қилинишича, учрашув доирасида икки томонлама савдони рағбатлантириш мақсадида банклараро тўловларни такомиллаштириш масалалари атрофлича кўриб чиқилди.
Мулоқот давомида Ўзбекистон ва Покистоннинг айрим тижорат банклари ўртасида корреспондентлик алоқалари ўрнатилганига қарамасдан тадбиркорлик субъектлари томонидан ушбу турдаги банк хизматларидан кенг фойдаланилмаётгани таъкидланиб, мазкур масала юзасидан тадқиқот ишлари ўтказилиши зарурлиги таъкидланди.
Жамил Аҳмад Покистонда хорижий банклар ва давлатлар билан тўловлар эркин амалга оширилаётганини алоҳида эътироф этди. Мамлакат ҳудудида фаолиятини йўлга қўйишни истаган ўзбек банкларига, дастлаб, ўз ваколатхонасини ташкил этишни, сўнгра, уни филиалга айлантиришни тавсия қилди.
Суҳбат чоғида, шунингдек, хорижий мамлакатлар билан ўрнатилган бартер тизими ва унинг ишлаш тамойиллари тўғрисида маълумот тақдим этилди.
Учрашув якунида икки мамлакат ўртасидаги банклараро тўловларни такомиллаштириш ва замонавий банк хизматларини йўлга қўйиш мақсадида Ўзбекистоннинг Марказий ва тижорат банклари вакилларидан иборат делегацияси Покистонга таклиф этилди.
Аввалроқ Ўзбекистонда аҳоли бандлигини таъминлашга қаратилган “маҳалла лойиҳаси” дастури доирасида ажратиладиган 1 миллиард доллар кредит ресурслари банклар ва ҳудудлар кесимида тақсимланиши ҳақида хабар берилганди.
Изоҳ (0)