Жиззах вилояти ҳокимига икки ўринбосар тайинланди. Бу ҳақда вилоят ҳокимлиги матбуот хизмати хабар берди.
Зафар Азимов вилоят ҳокимининг молия-иқтисодиёт ва камбағаликни қисқартириш масалалари бўйича биринчи ўринбосари – вилоят Иқтисодиёт ва молия бош бошқармаси бошлиғи лавозимига тайинланди.
Зафар Азимов 1985 йилда Самарқанд вилояти, Самарқанд шаҳрида таваллуд топган. У мазкур тайинловга қадар камбағалликни қисқартириш ва бандлик вазирининг биринчи ўринбосари лавозимида фаолият олиб бораётган эди.
Шунингдек, Зафар Рўзиев вилоят ҳокимининг қишлоқ ва сув хўжалиги масалалари бўйича ўринбосари – қишлоқ хўжалиги бошқармаси бошлиғи лавозимига тайинланди.
Зафар Рўзиев 1964 йилда Қашқадарё вилояти, Китоб туманида таваллуд топган. У мазкур тайинловга қадар 2019 йилдан буён Зарбдор тумани ҳокими вазифасида ишлаб келаётган эди.
Маълумот учун, вилоят ҳокимининг молия-иқтисодиёт ва камбағаликни қисқартириш масалалари бўйича биринчи ўринбосари - вилоят Иқтисодиёт ва молия бош бошқармаси бошлиғи лавозимида 2021 йилдан бугунги кунгача Абдувалижон Мустанов ҳамда вилоят ҳокимининг қишлоқ ва сув хўжалиги масалалари бўйича ўринбосари лавозимида 2019 йилдан бугунги кунгача Ойбек Ашурматов ишлаб келаётган эди.
19 декабрь куни Эргаш Солиев бошқа ишга ўтиши муносабати билан Жиззах вилояти ҳокими лавозимидан озод этилганди. Унинг ўрнига Улуғбек Мустафоев Жиззах вилояти ҳокими вазифасини бажарувчи лавозимига тайинланди. Тайинловга қадар у 2019 йил апрелидан буён “Ҳудудий электр тармоқлари” акциядорлик жамияти бошқаруви раиси лавозимида ишлаб келган.
Улуғбек Мустафоев ҳақида
У 1968 йил Жиззах вилоятида туғилган. Тошкент халқ хўжалиги институтини битирган. “Саноатқурилишбанк”нинг Жиззах вилоят филиалида кичик, кейинчалик катта мутахассис сифатида ишлади. Кейинги йилларда Марказий банкнинг операцион бошқаруви катта иқтисодчиси ва пул муомаласи бўлими бошлиғи лавозимларида ишлаган. Кейин 2016 йилгача Марказий банк раисининг биринчи ўринбосари, 2016 йилда Жиззах вилояти ҳокимининг биринчи ўринбосари, 2017 йилда “Ўзбекэнерго” АЖ бошқаруви раиси лавозимига тайинланган.
Изоҳ (0)