2024 йил якунлари бўйича мамлакатда йиллик расмий инфляция 9,8 фоизни ташкил этди. Бу ҳақда Статистика агентлиги маълум қилди.
Декабрда ойлик инфляция даражаси 1 фоизни ташкил этган. Бунда озиқ-овқат маҳсулотлари 1,8 фоиз, ноозиқ-овқатлар 0,4 фоиз, хизматлар 0,7 фоизга қимматлашган.
Декабрь ойида айрим маҳсулотлар нархи ноябрдагига нисбатан қуйидагича ошган:
- пахта ёғи — 9,2 фоиз;
- кунгабоқар ёғи — 6,1 фоиз;
- тухум — 19,5 фоиз;
- мол гўшти — 0,7 фоиз;
- қўй гўшти — 0,6 фоиз;
- товуқ гўшти — 1,1 фоиз;
- бодринг — 52,7 фоиз;
- булғор қалампири — 46,5 фоиз;
- бақлажон — 27,7 фоиз;
- помидор — 22,4 фоиз;
- картошка — 6,3 фоиз;
- пиёз — 5,7 фоиз;
- сут — 1,6 фоиз.
Декабрда иссиқ сув нархи 1,4 фоиз, иситиш тизими 1,7 фоиз, электр, газ ва ёнилғининг бошқа турлари 0,1 фоиз кўтарилди.
Ўзбекистонда йиллик ҳисобда энергетика тарифлари рекорд даражада ошириб юборилди. Жумладан, нархлар 2024 йил декабрь ойида 2023 йил декабрдагидан қуйидаги даражаларда қимматлаштирилди:
- газ — 129 фоиз;
- электр энергияси — 67 фоиз;
- иссиқ сув таъминоти — 32,1 фоиз;
- иситиш тизими — 36 фоиз.
2024 йилда газ ва ток нархи қимматлашиши йиллик инфляцияни 3,6 фоизга ошириб юборган.
2025 йил 1 апрелдан электр энергияси нархи 24 фоиз, газ 36 фоиз, пропан 25 фоиз, метан 39 фоизга оширилиши белгиланган. Жумладан, электр ва газ нархлари ўсишининг ўзи инфляция даражасини 1,8 фоизгача кўтариб юбориши кутилмоқда.
2019 йилдаги президент фармонида Марказий банкка инфляцияни 2021 йилда 10 фоизга пасайтириш, 2023 йилда эса 5 фоиз даражадаги доимий инфляцион мақсадни (таргет) ўрнатиш топширилган. Бироқ фискал ва бошқа қатор омиллар сабаб бу мақсадга эришиш кечикмоқда.
Иқтисодиёт ва молия вазирлиги эълон қилган 2025–2027 йил бюджет мўлжалларига оид прогнозларда жорий йил якунида инфляция даражаси 9 фоиз шаклланиши келтирилган. Марказий банк кутилмалари эса 9,5 фоиз бўлганди. Бироқ мазкур прогнозлар ўзини оқламади.
Кутилмаларга кўра, 2025 йил якунида йиллик инфляция 7 фоизга пасайиши мумкин. 2026 йилда эса мамлакатда инфляция даражаси 5–6 фоизга, 2027 йилда мақсад қилинган рақам — 5 фоизга пасайтирилиши прогноз қилинган.
Изоҳ (1)
Manashu narx ko'tarilishi yani inflyatsini jadal o'sishiga aybdor shaxslarni o'z mas'uliyatini bajarmaganlarni jazolash va ularni har biridan tovon puli undirish kerak nima shaxar bedarvozami ularga qancha qancha shaxslar davlat budjetini talon taroj qildi o'zlashtirdi yoki pora evaziga sotdi shularni umrbotga qamash kerak toki qolganlar ko'rib qo'ysin davlat budjetini talon taroj qilish oqibatini.