Бортида Малави вице-президенти Саулос Чилима ва унга ҳамроҳлик қилган тўққиз киши бўлган самолёт ҳалокатга учради, уларнинг ҳеч бири омон қолмади. Бу ҳақда Малави президенти администрациясига таяниб, The Sun хабар берди.
“Бортида вице-президент, ҳурматли доктор Саулос Чилимани олиб кетаётган самолёт 11 июнь куни эрталаб Чикангава ўрмонида топилди. Афсуски, ҳалокат натижасида бортдагиларнинг барчаси ҳалок бўлди”, — дейилади президент администрацияси хабарида.
Малави етакчиси Lazarus Чаквера мамлакатда миллий мотам эълон қилди ва бугундан бошлаб дафн маросимигача барча байроқлар ярим туширилишини айтди. Ҳалокатга учраган самолётда вице-президентдан ташқари собиқ биринчи хоним Патриси Шанил Мулузи ҳам бўлган. У 1994 йилдан 2004 йилгача мамлакат раҳбари бўлиб ишлаган Малавининг иккинчи президенти Бакили Мулузининг рафиқаси эди.
Малави вице-президенти Саулос Чилима 51 ёшда бўлган. Унинг рафиқаси ва икки нафар фарзанди бор. Чилима 2014 йилдан бери вице-президент лавозимида ишлаб келаётганди.
У ва яна тўққиз киши бўлган самолёт 10 июнь куни эрталаб Лилонгведан ҳавога кўтарилганидан сўнг радарлардан ғойиб бўлган. Самолёт маҳаллий вақт билан соат 10:00 дан кейин мамлакат шимолидаги Мзузу халқаро аэропортига қўниши керак эди. Авиатехника собиқ адлия вазири Ралф Касамбаранинг дафн маросимига учаётган эди.
Маълумот ўрнида, 19 май куни Эрон президенти Иброҳим Раисий авиаҳалокат натижасида вафот этганди. Мамлакат шимоли-ғарбида Эрон президенти ва ташқи ишлар вазири бўлган вертолёт ҳалокатга учраганди. Кучли туман ва тоғли ҳудуд туфайли ҳалокатга учраган вертолётни қидириш 10 соатдан ортиқ давом этган. Мутахассислар фикрича, фалокат техник носозлик ёки инсон омили туфайли юз берган бўлиши мумкин. Раисий вафоти муносабати билан Эронда беш кунлик мотам эълон қилинганди.
Изоҳ (0)